देवगड : देवगड हापूसचा दरारा पुन्हा एकदा मुंबईच्या वाशी मार्केटमध्ये पाहायला मिळाला आहे. आंब्याचा नियमित हंगाम सुरू होण्यास अद्याप अवकाश असतानाच देवगडच्या हापूसने बाजारपेठेत जोरदार सलामी दिली आहे. देवगडमधील प्रगतशील बागायतदार मिलेश बांदकर यांनी पाठवलेल्या हापूस आंब्याच्या एका पेटीला वाशी मार्केटमध्ये तब्बल ३६ हजार रुपयांचा भाव मिळाला. हंगामापूर्वीच मिळालेल्या या विक्रमी दराने आंबा बागायतदारांचे लक्ष वेधले असून देवगड हापूसची चर्चा पुन्हा रंगली आहे.

विशेष म्हणजे, हा आंबा नेहमीच्या हंगामातील नसून जुलै महिन्यात आलेल्या मोहरातील आहे. या मोहरातून तयार झालेली फळे योग्य वेळी आणि योग्य पद्धतीने टिकवून ठेवण्यासाठी बांदकर यांनी विशेष काळजी घेतली. झाडावरील आंब्यांची सातत्याने निगा राखत ऑक्टोबर महिन्यापर्यंत ते आंबे तयार अवस्थेत ठेवण्याचा प्रयोग त्यांनी केला. त्यांच्या या नियोजनबद्ध प्रयत्नांना आता वाशी मार्केटमधील ३६ हजारांच्या भावाच्या रूपाने मोठे यश मिळाले आहे.

नियमित हंगामापूर्वीच देवगड हापूसने एवढा मोठा दर मिळविल्याने आंबा उत्पादकांमध्ये उत्सुकता वाढली आहे. योग्य नियोजन, आधुनिक दृष्टिकोन आणि प्रयोगशील वृत्तीची जोड मिळाल्यास हापूसच्या उत्पादनात वेगळे यश मिळवता येऊ शकते, हे मिलेश बांदकर यांच्या प्रयोगातून पुन्हा अधोरेखित झाले आहे.