वैभववाडी : तालुक्यातील तिरवडे तर्फ सौंदळ गावचे सुपुत्र आणि उद्योजक योगेश अनंत इंदुलकर यांची राष्ट्रवादी काँग्रेस पार्टी (अजित पवार गट) यांच्या मुंबई विभागीय चिटणीसपदी नियुक्ती करण्यात आली आहे. पक्षाचे प्रदेशाध्यक्ष सुनील तटकरे यांनी त्यांना नुकतेच नियुक्तीपत्र प्रदान केले.

योगेश इंदुलकर हे गेल्या अनेक वर्षांपासून राष्ट्रवादी काँग्रेस पक्षात सक्रिय आहेत. सध्या ते अजित पवार गटात कार्यरत असून, मुंबईतील विलेपार्ले येथे वास्तव्यास आहेत. राजकीय क्षेत्रासोबतच उद्योजक म्हणूनही त्यांनी आपली वेगळी ओळख निर्माण केली आहे.

नेर्ले-तिरवडे पंचक्रोशी शिक्षण संस्थेचे अध्यक्ष म्हणूनही ते जबाबदारी सांभाळत आहेत. स्वतःचा व्यवसाय आणि राजकीय क्षेत्रातील कार्याचा समतोल राखताना छत्रपती शिवाजी माध्यमिक विद्यालय व ज्युनिअर कॉलेजच्या प्रगतीसाठी ते सातत्याने प्रयत्नशील आहेत. शैक्षणिक संस्थेला आवश्यक भौतिक सुविधा उपलब्ध करून देण्यातही त्यांचे योगदान आहे.

स्वर्गीय अजित पवार यांच्याशी निकटचे संबंध असलेले इंदुलकर यांच्यावर पक्षाने मुंबई विभागीय चिटणीसपदाची जबाबदारी सोपविल्याने त्यांच्या राजकीय कार्याची दखल घेतल्याचे मानले जात आहे. त्यांच्या नियुक्तीमुळे तिरवडे-नेर्ले पंचक्रोशीसह वैभववाडी तालुक्यातील मित्रपरिवार आणि हितचिंतकांकडून अभिनंदनाचा वर्षाव होत आहे.