सिंधुदुर्गनगरी : जिल्ह्यात मद्यप्राशन करून वाहन चालविणाऱ्यांचे वाढते प्रमाण चिंतेचा विषय ठरत असताना वाहतूक पोलिस विभाग आणि उपप्रादेशिक परिवहन कार्यालयाने (आरटीओ) अशा वाहनचालकांविरोधात कठोर भूमिका घेतली आहे. गेल्या दीड वर्षात ड्रंक अँड ड्राइव्ह प्रकरणी तब्बल २०७ वाहनचालकांवर कारवाई करण्यात आली असून, यामध्ये २०२५ या वर्षभरात केवळ ३६ जणांवर कारवाई झाली होती. मात्र, १ जानेवारी ते २० जुलै २०२६ या अवघ्या साडेसहा महिन्यांच्या कालावधीतच १७१ वाहनचालकांवर कारवाई करण्यात आल्याने प्रशासनाने धडक मोहीम सुरू केल्याचे स्पष्ट झाले आहे.

दारूच्या नशेत वाहन चालविण्यामुळे होणारे गंभीर अपघात रोखण्यासाठी वाहतूक पोलिस आणि आरटीओकडून जिल्हाभर विशेष तपासणी मोहीम राबविली जात आहे. शहरांबरोबरच ग्रामीण भागातील प्रमुख मार्गांवरही वाहनांची तपासणी करण्यात येत असून, अत्याधुनिक ब्रेथ अॅनालायझरच्या सहाय्याने मद्यप्राशनाची खातरजमा केली जात आहे. या कारवाईमुळे मद्यधुंद वाहनचालकांमध्ये मोठी धास्ती निर्माण झाली आहे.

गतवर्षीच्या तुलनेत यंदा पाचपट कारवाई

ड्रंक अँड ड्राइव्हविरोधातील कारवाईची आकडेवारी पाहता, यंदा प्रशासनाने अधिक कठोर भूमिका घेतल्याचे दिसून येते. २०२५ मध्ये केवळ ३६ प्रकरणे नोंदविण्यात आली होती. मात्र, २०२६ मध्ये अवघ्या साडेसहा महिन्यांतच १७१ वाहनचालक कारवाईच्या जाळ्यात अडकले आहेत. त्यामुळे मागील वर्षाच्या तुलनेत यंदा कारवाईचे प्रमाण लक्षणीय वाढले आहे.

जागेवर दंड नाही; थेट न्यायालयीन कारवाई

ड्रंक अँड ड्राइव्हच्या प्रकरणांमध्ये इतर वाहतूक नियमांप्रमाणे जागेवर दंड आकारला जात नाही. मद्यप्राशन केल्याचे सिद्ध झाल्यानंतर संबंधित वाहनचालकाविरुद्ध मोटार वाहन कायद्यातील कलम १८५ अन्वये गुन्हा नोंदवून त्याला न्यायालयात हजर राहण्याची नोटीस बजावली जाते. त्यानंतर न्यायालयाकडून दंड अथवा शिक्षेबाबत निर्णय घेतला जातो.

काय सांगतो मोटार वाहन कायदा?

मोटार वाहन कायद्यानुसार मद्यप्राशन करून वाहन चालवताना पहिल्यांदा आढळल्यास दहा हजार रुपयांपर्यंत दंड किंवा सहा महिन्यांपर्यंत कारावास अथवा दोन्ही शिक्षा होऊ शकतात. त्याचप्रमाणे दुसऱ्यांदा हा गुन्हा केल्यास १५ हजार रुपयांपर्यंत दंड आणि दोन वर्षांपर्यंत कारावासाची तरतूद करण्यात आली आहे. त्यामुळे ड्रंक अँड ड्राइव्ह हा केवळ वाहतूक नियमभंग नसून गंभीर स्वरूपाचा गुन्हा मानला जातो.

लाखो रुपयांच्या ई-चलनाची थकबाकी

दरम्यान, वाहतूक नियमांचे उल्लंघन करणाऱ्या अनेक वाहनचालकांकडे लाखो रुपयांच्या ई-चलनाची थकबाकी असल्याचेही समोर आले आहे. हेल्मेट न वापरणे, वेगमर्यादा ओलांडणे, सिग्नलचे उल्लंघन करणे आदी नियमभंगांच्या दंडाची रक्कम अनेक वाहनचालकांकडून भरली जात नसल्याने वसुलीचे मोठे आव्हान प्रशासनासमोर उभे ठाकले आहे.

मद्यप्राशनामुळे अपघाताचा धोका अधिक

वाहतूक तज्ज्ञांच्या मते, मद्यप्राशन केल्यानंतर वाहन चालविल्यास चालकाची निर्णयक्षमता कमी होते. वाहनावरील नियंत्रण सुटण्याची शक्यता वाढते, प्रतिसाद देण्याचा वेग कमी होतो आणि अपघात होण्याचा धोका अनेक पटींनी वाढतो. अशा अपघातांमध्ये केवळ वाहनचालकच नव्हे, तर निष्पाप नागरिकांचाही जीव धोक्यात येऊ शकतो.

अधिकाऱ्यांचे आवाहन

"मद्यप्राशन करून वाहन चालविणाऱ्यांवर सातत्याने कारवाई केली जात आहे. वाहनचालकांनी स्वतःच्या आणि इतरांच्या सुरक्षिततेसाठी वाहतूक नियमांचे पालन करावे. दारू पिऊन वाहन चालविणे टाळून जबाबदार नागरिक म्हणून वागावे."

- आशिष लोकरे, सहाय्यक उपप्रादेशिक परिवहन अधिकारी, सिंधुदुर्ग

मद्यप्राशन करून वाहन चालविणाऱ्यांविरोधातील ही मोहीम आगामी काळात आणखी तीव्र करण्यात येणार असून, वाहतूक सुरक्षेला बाधा आणणाऱ्यांविरोधात कोणतीही तडजोड केली जाणार नसल्याचे प्रशासनाने स्पष्ट केले आहे.