नवी दिल्ली : भारत आणि न्यूझीलंड यांच्यातील दुसरी एकदिवसीय लढत आज वेलिंग्टन येथे खेळवण्यात आली. भारतीय संघाने ही लढत चार धावांनी डकलवर्थ लुईस स्टर्न अर्थात डीएलएस नियमानुसार जिंकली आणि मालिकेत २-० अशी आघाडी घेतली. भारताकडून गुरनूर ब्रारने उत्कृष्ट गोलंदाजी करत चार बळी मिळवले.

पावसामुळे व्यत्यय आलेल्या या दुसऱ्या एकदिवसीय सामन्यात, भारताने डकलवर्थ-लुईस-स्टर्न (DLS) नियमाच्या आधारे न्यूझीलंडचा चार धावांनी पराभव केला. पावसाच्या व्यत्ययामुळे ४७ षटकांच्या या सामन्यात प्रथम फलंदाजी करणाऱ्या न्यूझीलंडचा संघ ४१ षटकांत १३४ धावांत सर्वबाद झाला. 

प्रत्युत्तरात, भारताच्या फलंदाजांच्या विकेट्स ठराविक अंतराने पडत होत्या. जेव्हा पावसामुळे खेळ थांबवण्यात आला, तेव्हा कठीण परिस्थितीत फलंदाजी करत असलेल्या भारताला विजयासाठी २१ षटकांत आणखी २२ धावांची गरज होती. त्यानंतर पाऊस न थांबल्यामुळे सामना पुन्हा सुरू होऊ शकला नाही आणि डीएलएस नियमानुसार भारताला चार धावांनी विजयी घोषित करण्यात आले.

पाच सामन्यांच्या मालिकेतील या दुसऱ्या सामन्यात, भारतीय कर्णधार शुभमन गिलने नाणेफेक जिंकून प्रथम गोलंदाजी करण्याचा निर्णय घेतला. भारतीय गोलंदाजांनी अचूक मारा करत न्यूझीलंडला अवघ्या १३४ धावांत गुंडाळले. १३५ धावांच्या लक्ष्याचा पाठलाग करताना २६ षटकांत भारताची अवस्था ७ बाद ११३ धावा अशी होती. तेव्हा वेलिंग्टनमध्ये मुसळधार पाऊस सुरू झाला आणि खेळ थांबवावा लागला. ही परिस्थिती भारताच्या पथ्यावर पडली, कारण त्या वेळी भारताच्या खात्यात ११३ धावा होत्या. ज्या डीएलएस नियमानुसार आवश्यक असलेल्या 'पार स्कोअर'पेक्षा चार धावांनी अधिक होत्या. या विजयासह शुभमन गिल आणि त्याच्या संघाने मालिकेत २-० अशी आघाडी घेतली असून, आता पुढच्या सामन्यात मालिका जिंकण्याच्या उद्देशाने ते मैदानात उतरतील.

Rain has the final say as #TeamIndia clinch a 4️⃣-run win via DLS to go 2-0 up in the series 💙 Scorecard ▶️ https://t.co/pxZRYf6dYV #NZvIND https://t.co/9QywzpNCKh

— BCCI (@BCCI) November 7, 2026