पुणे : आधुनिक तंत्रज्ञानाच्या युगात रमलेल्या नव्या पिढीने, विशेषतः 'जेन झी'ने कोकणी भाषा आणि साहित्यापासून दूर जाऊ नये. तरुणांनी कोकणी साहित्याचे वाचन करावे, स्वतः लेखन करावे आणि आपल्या भाषेच्या समृद्ध परंपरेत योगदान द्यावे, असे आवाहन गोव्याचे मुख्यमंत्री डॉ. प्रमोद सावंत यांनी केले.

पुणे येथे अखिल भारतीय कोकणी परिषद आणि औद्योगिक तंत्र शिक्षण संस्था यांच्या संयुक्त विद्यमाने आयोजित ३४ व्या अखिल भारतीय कोकणी अधिवेशनाच्या उद्घाटन सोहळ्यात प्रमुख पाहुणे म्हणून ते बोलत होते. यावेळी त्यांनी गोवा मुक्ती लढ्यात पुणे आणि मुंबईतील व्यक्तींचे योगदान अविस्मरणीय असल्याचे नमूद केले.

दरम्यान, महाराष्ट्रात कोकणी भाषेच्या संवर्धनासाठी स्वतंत्र कोकणी अकादमी स्थापन करण्याचा प्रस्ताव मुख्यमंत्री सावंत यांनी मांडला. यासाठी महाराष्ट्राचे मुख्यमंत्री देवेंद्र फडणवीस यांना पत्र लिहून अकादमी स्थापन करण्याची विनंती करणार असल्याचे त्यांनी जाहीर केले.

मुख्यमंत्री डॉ. सावंत म्हणाले, महाराष्ट्रात वास्तव्यास असलेल्या कोकणी भाषिकांना साहित्यनिर्मिती, भाषेचा अभ्यास आणि सांस्कृतिक उपक्रमांसाठी स्वतंत्र व्यासपीठ उपलब्ध व्हावे, हा या मागणीमागील उद्देश आहे. गोव्याच्या स्वातंत्र्यलढ्यात कोकणी साहित्यिकांनी महत्त्वपूर्ण योगदान दिले आहे. 

साहित्यिकांनी आपल्या लेखणीच्या माध्यमातून जनजागृती करत स्वातंत्र्यचळवळीला बळ दिले. त्याचप्रमाणे गोव्याच्या मुक्तिसंग्रामात पुणे आणि मुंबईतील नागरिकांनी दिलेले योगदानही विसरता येणार नाही, असे मुख्यमंत्री सावंत यांनी आवर्जून सांगितले. 

कोकणी भाषा ही केवळ संवादाचे माध्यम नसून गोव्याची सांस्कृतिक ओळख आणि साहित्यिक परंपरेचा महत्त्वाचा भाग आहे. ही परंपरा पुढील पिढीपर्यंत पोहोचविण्यासाठी तरुणांचा सहभाग वाढणे आवश्यक आहे. त्यासाठी वाचन, लेखन आणि साहित्यिक उपक्रमांमध्ये नव्या पिढीने पुढाकार घ्यावा, असा संदेश मुख्यमंत्री सावंत यांनी दिला.