सोलापूर : सोलापूर विमानतळावर आज प्रशिक्षणार्थी वैमानिकाद्वारे प्रशिक्षण विमान उडवण्याचा प्रयत्न करताना विमान धावपट्टीवरून घसरल्याने विमानाचा अपघात घडला. विमान घसरल्याने धावपट्टीवरून बाहेर गेले. या दुर्घटनेत वैमानिकाला कोणतीही दुखापत झालेली नाही. विमानात नेमके किती लोक होते, हे अद्याप स्पष्ट झालेले नाही. घटनास्थळावरुन समोर आलेल्या विमानांच्या फोटोंनुसार विमान पुढच्या दिशेला झुकलेले आणि त्याचा पुढचा भाग जमिनीला टेकलेला दिसत आहे.

'टाइम्स नाऊ'च्या वृत्तानुसार, गुरुवारी १२ नोव्हेंबर रोजी सोलापूर विमानतळावर हे विमान एक महिला प्रशिक्षणार्थी वैमानिक चालवत होती. उड्डाण करण्याचा प्रयत्न करत असताना विमान धावपट्टीवरून घसरले. उड्डाणादरम्यान विमानावरील नियंत्रण सुटण्याचे नेमके कारण अद्याप स्पष्ट झालेले नाही. सुदैवाने, प्रशिक्षणार्थी वैमानिक सुरक्षित असून तिला कोणतीही दुखापत झालेली नाही. तसेच कोणतीही जीवितहानी झाल्याचे वृत्त नाही. 

सोलापूर विमानतळ प्रशासनाने या घटनेबाबत अद्याप कोणतेही अधिकृत निवेदन जारी केलेले नाही. एका प्रशासकीय अधिकाऱ्याने पीटीआयला सांगितले की, एका फ्लाइंग क्लबचे हे विमान दुपारी अडीचच्या सुमारास उड्डाण करण्याचा प्रयत्न करत असताना धावपट्टीवरून बाहेर गेले. घटनेनंतर अग्निशमन दल, रुग्णवाहिका आणि पोलीस पथकासह आपत्कालीन सेवा तत्काळ विमानतळावर पोहोचल्या. सध्या परिस्थिती नियंत्रणात आहे.