पणजी : गोव्यातील मांडवी पुलावर सोमवारी दि. २६ ऑक्टोबर रोजी पहाटे झालेल्या अपघातात दोन विद्यार्थ्यांचा मृत्यू झाला. महाराष्ट्रात नोंदणी असलेल्या दुचाकीची टॅक्सीला जोरदार धडक बसल्याने ही दुर्घटना घडली. या अपघातात कुशाग्र पटाळे (वय २१, मुंबई) आणि यश मालिक सिंग (वय २०, हरियाणा) यांचा मृत्यू झाला. दोघेही सांकवाळ येथील कायदा महाविद्यालयात शिक्षण घेत होते.

मिळालेल्या माहितीनुसार, कुशाग्र पटाळे आणि यश मालिक सिंग हे दोघे दुचाकीवरून मांडवी पुलावरून प्रवास करत होते. पहाटे सुमारे ३ ते ३.१५ वाजण्याच्या दरम्यान त्यांच्या दुचाकीची टॅक्सीला धडक बसली. धडक इतकी जोरदार होती की, दुचाकीवरील दोघांचाही जागीच मृत्यू झाला.

या अपघातात टॅक्सीचालकासह वाहनातील काही प्रवाशांना किरकोळ दुखापत झाली. जखमींना पुढील उपचारांसाठी गोवा वैद्यकीय महाविद्यालयाच्या (जीएमसी) रुग्णालयात दाखल करण्यात आले आहे.घटनेची माहिती मिळताच पोलिसांनी तपास सुरू केला असून, अपघात नेमका कशामुळे झाला, याचा पुढील तपास पोरवोरिम पोलीस करत आहेत.