कुडाळ : मुंबई-गोवा महामार्गावर बिबवणे येथे रविवारी सायंकाळी ६.३० वाजेच्या सुमारास एका चालत्या डंपरला अचानक भीषण आग लागल्याची खळबळजनक घटना घडली. या दुर्घटनेत डंपर (क्रमांक MH07C6198) पूर्णतः जळून खाक झाला आहे. मात्र, चालकाने दाखवलेल्या प्रसंगावधानामुळे कोणतीही जीवितहानी झाली नसून मोठी दुर्घटना टळली आहे.

मिळालेल्या अधिक माहितीनुसार, सदर डंपर चिरे वाहतुकीसाठी कसालच्या दिशेने जात होता. चालक वासुदेव भगवान तळवणेकर (रा. मळेवाड, सावंतवाडी) यांनी झाराप येथील पेट्रोल पंपावर इंधन भरल्यानंतर गाडी कसालच्या दिशेने पुढे मारली. बिबवणे येथे पोहोचताच अचानक डंपरचा जॉइंट तुटला. या तांत्रिक बिघाडानंतर गाडीने लगेचच पेट घेतला. चालकाने अत्यंत प्रसंगावधान राखून गाडीवर नियंत्रण मिळवत स्वतःचा जीव वाचवला.

काही वेळातच आगीने रौद्ररूप धारण केले. घटनेची माहिती मिळताच कुडाळ नगरपंचायत व कुडाळ एम.आय.डी.सी. अग्निशामक दलाचे बंब तसेच कुडाळ पोलीस तत्काळ घटनास्थळी दाखल झाले. अग्निशमन दलाच्या जवानांनी आगीवर नियंत्रण मिळवले; मात्र तोपर्यंत डंपर पूर्णपणे जळून खाक झाला होता. या अपघातामुळे मुंबई-गोवा महामार्गावर काही काळ वाहतूककोंडी झाली होती. पोलिसांच्या मदतीने वाहतूक सुरळीत करण्यात आली.