सावंतवाडी : येथील एका निर्जन बागेत बसलेल्या शाळकरी अल्पवयीन मुलगा आणि मुलीला दमदाटी करून तब्बल दोन तास कोंडून ठेवल्याची संतापजनक घटना समोर आली आहे. याप्रकरणी सावंतवाडी पोलीस ठाण्यात दोन युवकांविरोधात गुन्हा दाखल करण्यात आला असून पोलिसांनी दोघांनाही अटक केली आहे.

रुपेश परब (वय २७) आणि विनायक कवडेकर (वय २२) अशी अटक करण्यात आलेल्या संशयित तरुणांची नावे आहेत. मंगळवारी एक शाळकरी अल्पवयीन मुलगा व मुलगी तालुक्यातील एका निर्जन बागेच्या ठिकाणी गेले होते. यादरम्यान संशयित आरोपींनी त्या मुलांना गाठत दमदाटी केली आणि "तुम्ही रात्रीच्या वेळी येथे का बसलात?" अशी विचारणा करत त्यांना तब्बल दोन तास एका ठिकाणी कोंडून ठेवले.

अखेर कसेबसे संशयितांच्या तावडीतून सुटका करून घेत त्या मुलांनी दुचाकीवरून पळ काढला. मात्र, संशयित तरुणांनी त्यांचा पाठलाग केला. घाबरलेल्या मुलांनी थेट सावंतवाडी पोलीस ठाणे गाठले आणि घडलेला सर्व प्रकार पोलिसांना सांगितला.

पोलिसांनी तातडीने पावले उचलत दोन्ही मुलांच्या पालकांना पोलीस ठाण्यात बोलावून घेत घडलेला प्रसंग सांगितला. त्यानंतर पालकांनी सावंतवाडी पोलीस ठाण्यात जाऊन त्या दोन संशयित युवकांविरुद्ध रीतसर तक्रार दाखल केली. पोलिसांनी तत्काळ कारवाई करत रुपेश परब आणि विनायक कवडेकर यांना अटक केली. त्यांना सावंतवाडी न्यायालयात हजर केले असता न्यायालयाने दोघांना एक दिवसाची पोलीस कोठडी सुनावली आहे. या प्रकरणाचा अधिक तपास सावंतवाडी पोलीस करत आहेत.