नवी दिल्ली : 'अंडर-१९ वनडे आशिया कप'मध्ये पाकिस्तानविरुद्ध सूड घेण्याची संधी भारताकडे आहे. गुरुवारी झालेल्या अंडर १९ पुरुष आशिया कप २०२६ च्या दुसऱ्या उपांत्य फेरीत भारताने अफगाणिस्तानचा ८ गडी राखून पराभव करत अंतिम फेरीत धडक मारली. त्यामुळे भारताचा सामना पाकिस्तानशी होणार आहे.

पहिल्या उपांत्य फेरीत पाकिस्तानने बांगलादेशचा ९ गडी राखून पराभव केला होता. याआधी गट टप्प्यात भारताला पाकिस्तानकडून ३ गडी राखून पराभव पत्करावा लागला होता. आता शनिवारी (१४ नोव्हेंबर) ओमानमधील अल अमरात क्रिकेट मैदानावर होणाऱ्या अंतिम सामन्यात भारत या पराभवाचा बदला घेण्याचा प्रयत्न करेल. हा सामना भारतीय प्रमाणवेळेनुसार सकाळी १०:३० वाजता सुरू होईल, तर नाणेफेक अर्धा तास आधी होईल.

अंडर १९ वर्षांखालील आशिया कप २०२६ च्या दुसऱ्या उपांत्य फेरीत अफगाणिस्तानने नाणेफेक जिंकून प्रथम फलंदाजी करण्याचा निर्णय घेतला. अफगाणिस्तानने प्रथम फलंदाजी करत ५० षटकांत ८ बाद २२७ धावा केल्या. २२८ धावांच्या लक्ष्याचा पाठलाग करताना, आर्यवीर सेहवाग आणि लक्ष्य यांनी पहिल्या विकेटसाठी ११७ धावांची भागीदारी करत भारतीय संघाला उत्कृष्ट सुरुवात करून दिली. आर्यवीर सेहवागने ५७ चेंडूंत ५१ धावा केल्या. यामध्ये चार चौकार आणि चार षटकारांचा समावेश होता. कर्णधार लक्ष्य राजेश रायचंदानीने ९० चेंडूंत ९३ धावांची दमदार खेळी केली.