नवी दिल्ली : दिल्ली पोलिसांनी आंतरराज्यीय हेरॉईन पुरवठा करणाऱ्या टोळीचा पर्दाफाश केला आहे. या कारवाईदरम्यान पोलिसांनी सुमारे ५० कोटी रुपये किमतीचे हेरॉईन जप्त केले आणि चार जणांना अटक केली. अधिकाऱ्यांनी सांगितले की, रोहिणी भागातील एका पथकाने ही कारवाई केली आणि दिल्लीत कार्यरत असलेले अंमली पदार्थांचे रॅकेट उद्ध्वस्त केले.

पोलिसांच्या माहितीनुसार, १६ सप्टेंबर रोजी बेगमपूर भागात अंमली पदार्थांची वाहतूक होत असल्याची गुप्त माहिती मिळाल्यावर पोलिसांनी सेक्टर-३२ मध्ये एका कारला अडवले आणि संशयित लक्ष्मण हुडाला ताब्यात घेतले. त्याच्या वाहनातून ३०० ग्रॅम हेरॉईन आणि ३ लाख रुपये रोख रक्कम जप्त करण्यात आली.

अटक करण्यात आलेल्या व्यक्तींमध्ये ५८ वर्षीय संशयित लक्ष्मण हुडा (रोहतक, हरियाणा येथील रहिवासी), ५१ वर्षीय संशयित अनिल ऊर्फ भोला (रघुबीर नगर, दिल्ली येथील रहिवासी), ३५ वर्षीय संशयित बबलू (बरेली, उत्तर प्रदेश येथील रहिवासी) आणि संशयित रुखसार अली ऊर्फ राजू (हा देखील बरेलीचाच रहिवासी) यांचा समावेश आहे.

एका पोलीस अधिकाऱ्याने सांगितले की, संशयित अनिल ऊर्फ भोला याला १७ सप्टेंबर रोजी सोनीपत (हरियाणा) येथून अटक करण्यात आली आणि त्याच्या कारमधून ५०१ ग्रॅम हेरॉईन जप्त करण्यात आले. 

पोलिसांच्या म्हणण्यानुसार, तो यापूर्वी १२ गुन्ह्यांमध्ये सामील होता. भलस्वा डेअरी पोलीस ठाण्यात नोंदवलेल्या एनडीपीएस (NDPS) प्रकरणातील अंतरिम जामिनावर सुटल्यानंतर तो शरण आला नव्हता. त्यामुळे न्यायालयाने त्याला 'फरार' घोषित केले होते.

पोलिसांनी सांगितले की, पुढील तपास आणि तांत्रिक पाळत ठेवण्याच्या आधारे ४ ऑक्टोबर रोजी सीता कॉलनी, जानकीपुरम, लखनौ (उत्तर प्रदेश) येथील हेरॉईन निर्मिती केंद्रावर छापा टाकण्यात आला. तिथे बबलू याला पकडण्यात आले आणि ६.२७५ किलो हेरॉईन जप्त करण्यात आले. 

अधिकाऱ्यांनी दिलेल्या माहितीनुसार, या छाप्यात २.५०४ किलो सोडियम, ७८७ ग्रॅम ॲसिटिक एनहायड्राइड, एक टब, गॅस सिलेंडर, मिक्सर-ग्राइंडर, भांडी, पॉलिथिन पिशव्या, इलेक्ट्रॉनिक वजन काटा, लाकडी टोपली आणि हेरॉईन उत्पादनासाठी वापरले जाणारे इतर साहित्यही सापडले. 

बबलूने दिलेल्या माहितीच्या आधारे, ड्रग्ज तयार करण्यात येणाऱ्या फॅक्टरीचा मालक आणि मुख्य पुरवठादार असलेल्या रुखसार अली (उर्फ राजू) याला बरेलीमध्ये अटक करण्यात आली. पोलिसांच्या म्हणण्यानुसार, या कारवाईमुळे दिल्ली-एनसीआरपासून उत्तर प्रदेशपर्यंत पसरलेले हेरोइनचे उत्पादन आणि आंतरराज्यीय पुरवठा करणारी टोळी उघडकीस आली आहे. या प्रकरणाचा पुढील तपास सुरू आहे.