दापोली : थंडीची चाहूल लागल्यावर कोकणात सर्व समुद्रकिनाऱ्यांवर सीगल्स पक्षी येतात. मात्र यंदा हे पक्षी ऑक्टोबर हिट सुरू झाल्यावर कोकणात आढळू लागले आहेत. दापोली तालुक्यातील हर्णै -पाळंदे समुद्रकिनारी स्थलांतरित समुद्री पक्ष्यांचे आगमन सुरू झाले आहे. चार दिवसांपूर्वी हर्णै किनाऱ्यावर ‘सीगल्स’ पक्ष्यांचे २०२६ हंगामातील पहिले दर्शन झाले. अजून रत्नागिरीतील भाट्ये किनारा, मांडवी, मिऱ्या, काळबादेवी, गणपतीपुळे, गणेशगुळे, जयगड, राजापूरमधील समुद्र किनाऱ्यांवर अजून हे पक्षी आल्याचे वृत्त नाही.
समुद्री जीव व अधिवास संवर्धन संशोधक फहाद जमादार हे नेहमीप्रमाणे हर्णै-पाळंदे समुद्रकिनारी नियमित गस्त घालत असताना आणि समुद्री जैवविविधतेचे निरीक्षण करत असताना त्यांना समुद्रकिनारी सीगल पक्षी आढळून आले. या निरीक्षणाची त्यांनी नोंद केली आहे. त्यामुळे यंदाच्या स्थलांतरित समुद्री पक्ष्यांच्या हंगामाला सुरुवात झाल्याचे प्राथमिक निरीक्षण समोर आले आहे.
हर्णै-पाळंदे परिसरातील समुद्रकिनारा हा विविध प्रकारच्या समुद्री जीवसृष्टीसह स्थानिक आणि स्थलांतरित पक्ष्यांसाठी महत्त्वाचा अधिवास मानला जातो. विशेषतः हिवाळ्याच्या काळात या परिसरात विविध समुद्री व किनारी पक्ष्यांची संख्या वाढताना दिसते.
स्थलांतरित पक्ष्यांचे आगमन हे परिसरातील समुद्री आणि किनारी जैवविविधतेच्या दृष्टीने महत्त्वाचे मानले जाते. त्यामुळे अशा पक्ष्यांचे नियमित निरीक्षण, छायाचित्रण, नोंदणी आणि अधिवासाचे संवर्धन करणे आवश्यक आहे. हर्णै पाळंदे किनारपट्टीवरील जैवविविधतेच्या अभ्यासासाठी अशा नोंदी भविष्यात उपयुक्त ठरू शकतात.
