सावंतवाडी : वेत्ये येथे महामार्गाच्या शेजारी असलेल्या एका उघड्या शेडमध्ये उभी करून ठेवलेली हिरो कंपनीची मोटारसायकल अज्ञात चोरट्याने लांबवल्याची घटना समोर आली आहे. याप्रकरणी सावंतवाडी पोलीस ठाण्यात अज्ञात चोरट्याविरुद्ध चोरीचा गुन्हा दाखल करण्यात आला आहे.

मिळालेल्या माहितीनुसार, तक्रारदार विजय विलास लांडगे (वय २८, व्यवसाय - कॉन्ट्रॅक्टर, मूळ रा. मनेराजुरी, जि. सांगली, सध्या रा. निरवडे, ता. सावंतवाडी) यांनी आपली लाल-काळ्या रंगाची हिरो कंपनीची 'एचएफ डिलक्स' (क्रमांक MH 10 DE 6866) मोटारसायकल वेत्ये येथील हायवे शेजारील जितेंद्र गावकर यांच्या उघड्या शेडमध्ये उभी करून ठेवली होती. २५ ऑक्टोबर २०२६ रोजी सकाळी ९.०० ते सायंकाळी ५.३० वाजेच्या दरम्यान अज्ञात चोरट्याने संधी साधत ही मोटारसायकल लबाडीच्या इराद्याने चोरून नेली.

याप्रकरणी विजय लांडगे यांनी दिलेल्या तक्रारीवरून सावंतवाडी पोलिसांत गुन्हा दाखल करण्यात आला आहे. घटनेची माहिती मिळताच पोलीस उपनिरीक्षक प्रमोद पाटील आणि पोलीस हवालदार शिंदे यांनी घटनास्थळी भेट देऊन पाहणी केली. गुन्ह्याचा पुढील तपास पोलीस हवालदार धोत्रे करत असून दाखल अंमलदार म्हणून महिला पोलीस हवालदार कदम यांनी काम पाहिले. पोलीस निरीक्षक राजेंद्र मगदूम यांच्या मार्गदर्शनाखाली अज्ञात चोरट्याचा शोध सुरू आहे.