सावंतवाडी : सिंधुदुर्ग कबड्डी फेडरेशनच्या वतीने आयोजित किशोर-किशोरी जिल्हा अजिंक्यपद निवड चाचणी कबड्डी स्पर्धा शनिवार ७ नोव्हेंबर २०२६ रोजी जामसंडे हायस्कूल, देवगड येथे होणार आहे. या स्पर्धेत सहभागी होण्यासाठी सावंतवाडी तालुका कबड्डी असोसिएशनच्या वतीने शुक्रवार ६ नोव्हेंबर २०२६ रोजी दुपारी ३ वाजता वि. स. खांडेकर प्रशालेच्या मैदानावर तालुकास्तरीय निवड चाचणीचे आयोजन करण्यात आले आहे. 

सर्व शाळांच्या क्रीडा शिक्षकांनी तसेच कबड्डी मंडळांच्या व्यवस्थापकांनी प्रत्येकी २ किशोर व २ किशोरी खेळाडूंना या तालुकास्तरीय निवड चाचणीसाठी उपस्थित ठेवावे, असे आवाहन सावंतवाडी तालुका कबड्डी असोसिएशनच्या वतीने करण्यात आले आहे. या निवड चाचणीतून सिंधुदुर्ग जिल्हा अजिंक्यपद स्पर्धेसाठी तालुक्याचे दोन किशोर व दोन किशोरी संघ निवडण्यात येणार आहेत.

या निवड चाचणीसाठी खेळाडूंच्या वयोगट व वजन मर्यादा निश्चित करण्यात आल्या असून किशोर गटासाठी खेळाडूची जन्मतारीख १३ डिसेंबर २०१० किंवा त्यानंतरची असावी आणि वजन ६० किलोपेक्षा कमी असावे. तसेच किशोरी गटासाठी जन्मतारीख ३१ डिसेंबर २०१० किंवा त्यानंतरची असावी आणि वजन ५५ किलोपेक्षा कमी असावे.

खेळाडूंनी निवड चाचणीच्या वेळी स्वतःचे ओळखपत्र अद्ययावत स्वरूपात आणणे बंधनकारक असून, त्यावर जन्म तारीख, महिना व वर्ष स्पष्ट नमूद असणे आवश्यक आहे. सोबतच ओळखपत्राची रंगीत छायांकित प्रत व मूळ प्रत सोबत आणणे अनिवार्य आहे. या जिल्हा निवड चाचणी व तालुकास्तरीय चाचणीबाबत अधिक माहितीसाठी अजय जाधव यांच्याशी ९८२२६८८४६७ या क्रमांकावर संपर्क साधावा, असे सावंतवाडी तालुका कबड्डी असोसिएशन नोंदणी क्रमांक २९७७ कडून कळवण्यात आले आहे.