रत्नागिरी : खडतर आणि आव्हानात्मक ‘गोवा आयर्नमॅन ७०.३’ (ट्रायथलॉन) ही स्पर्धा रत्नागिरी सायकलिस्ट क्लबचे सदस्य व निश्चया वेलनेसचे संस्थापक डॉ. नितीन सनगर व अष्टपैलू राहुल भोसले यांनी ७ तास २ मिनिटांत यशस्वीपणे पूर्ण केली. गोवा येथे नुकतीच ही स्पर्धा झाली. आंतरराष्ट्रीय आयर्नमॅन आशिया समितीच्या अंतर्गत स्पर्धेचे आयोजन करण्यात आले होते.

आंतरराष्ट्रीय ट्रायथलॉनमध्ये जगभरातील ६८ देशांमधून तब्बल ३,५०० हून अधिक नामांकित खेळाडूंनी सहभाग नोंदवला. समुद्राच्या उसळत्या लाटांवर स्वार होत १.९ किमी खुल्या समुद्रात पोहणे, तीव्र चढ-उतारांच्या व खडतर मार्गांवर ९० किमी सायकलिंग आणि दमछाक करणाऱ्या किनारपट्टीच्या रस्त्यांवर २१.१ किमी अर्धमॅरेथॉन धावणे असे या स्पर्धेचे अतिशय कठीण स्वरूप होते. किंचितशीही चूक स्पर्धेतून बाहेर फेकले जाण्याची भिती असते. या दोन्ही धाडसी खेळाडूंनी अचूक नियोजन आणि चिकाटीच्या जोरावर हे सर्व अंतर ७ तास २ मिनिटांत पार पाडले.

डॉ. सनगर यांची ही चौथी ट्रायथलॉन होती. पण ७०.३ फॉरमॅटमधील तिसरी आणि अधिकृत 'आयर्नमॅन' म्हणून पहिलीच स्पर्धा ठरली. यापूर्वी त्यांनी सुपर रँडोनियर (२००, ३००, ४०० आणि ६०० किमी) सायकलिंगचे कठीण टप्पे पूर्ण केले आहेत. सलग तीन वर्षे ‘टाटा फुल मॅरेथॉन’ आणि सलग तीन वर्षे ‘सातारा हिल मॅरेथॉन’ यशस्वीरीत्या पूर्ण केली आहे. अलिकडेच त्यांनी सातारा हिल मॅरेथॉनमध्ये 'सब २' वेळेसह सुवर्णपदक पटकावले आहे. त्यांना कोल्हापूर येथील 'अर्हता'चे पंकज राउळू यांचे मोलाचे प्रशिक्षण लाभले.

रत्नागिरीच्या राहुल भोसले यांनी यापूर्वी दुबईच्या खोल समुद्रातील १० किमी ओशन मॅन ओपन वॉटर स्विमिंग, लोह पुरुष, मालवण येथील राज्यस्तरीय जलतरण स्पर्धा यांसह अनेक मॅरेथॉनमध्ये उत्कृष्ट कामगिरी केली आहे. गोवा आयर्नमॅन ७०.३ च्या तयारीसाठी त्यांनी डॉ. नितीन सनगर यांच्या मार्गदर्शनाखाली कसून सराव केला होता. शारीरिक आणि मानसिक क्षमतेची पराकाष्ठा पाहणाऱ्या या जागतिक दर्जाच्या महाकठीण स्पर्धेत यश मिळवून रत्नागिरीच्या शिरपेचात मानाचा तुरा रोवल्याबद्दल डॉ. सनगर आणि भोसले यांच्यावर क्रीडा क्षेत्रातून अभिनंदनाचा वर्षाव होत आहे.