मुंबई : अंडर १९ पुरुष आशिया कप २०२६ च्या दुसऱ्या उपांत्य फेरीत भारताने अफगाणिस्तानवर ८ गडी राखून दणदणीत विजय मिळवला. या विजयासह भारताने अंतिम फेरीत प्रवेश केला असून तिथे त्यांचा सामना पाकिस्तानशी होईल. पाकिस्तानने पहिल्या उपांत्य फेरीत बांगलादेशचा ९ गडी राखून पराभव केला होता. ओमानमधील अल अमेरात क्रिकेट मैदानावर प्रथम फलंदाजी करताना अफगाणिस्तानने ५० षटकांत ८ गडी गमावून २२७ धावा केल्या. प्रत्युत्तरात, लक्ष्य राजेश रायचंदानीच्या ९३ धावांच्या खेळीच्या आणि आर्यवीर सेहवागच्या अर्धशतकाच्या जोरावर भारताने अंतिम फेरी गाठली.

अंडर १९ वर्षांखालील आशिया कप २०२६ च्या दुसऱ्या उपांत्य फेरीत अफगाणिस्तानने नाणेफेक जिंकून प्रथम फलंदाजी करण्याचा निर्णय घेतला. अफगाणिस्तानने प्रथम फलंदाजी करत ५० षटकांत ८ बाद २२७ धावा केल्या. अफगाणिस्तानसाठी नोमान सलारझाई आणि शाह फैसल रहमानी यांनी प्रत्येकी ५१ धावा केल्या, तर सोहेल खान ३६ धावांवर नाबाद राहिला. भारताकडून इशानने तीन बळी घेतले. काव्या परेश पटेल आणि अर्जुन राजपूत यांनी प्रत्येकी एक बळी घेतला.

२२८ धावांच्या लक्ष्याचा पाठलाग करताना, आर्यवीर सेहवाग आणि लक्ष्य यांनी पहिल्या विकेटसाठी ११७ धावांची भागीदारी करत भारतीय संघाला उत्कृष्ट सुरुवात करून दिली. आर्यवीर सेहवागने ५७ चेंडूंत ५१ धावा केल्या. यामध्ये चार चौकार आणि चार षटकारांचा समावेश होता. कर्णधार लक्ष्य राजेश रायचंदानीने ९० चेंडूंत ९३ धावांची दमदार खेळी केली. तो शतकापासून थोडक्यात हुकला, पण त्याच्या खेळीत १३ चौकार आणि एका षटकाराचा समावेश होता. व्ही. के. विनीतनेही ६२ चेंडूंत ५७ धावांचे योगदान दिले, ज्यामध्ये चार चौकार आणि चार षटकार होते.

अंडर १९ भारतीय संघ

लक्ष राजेश रायचंदानी (कर्णधार), आर्यवीर सेहवाग, व्ही.के. विनीत, अर्जुन राजपूत, यशवर्धन चौहान, अन्वय द्रविड (यष्टीरक्षक), मनाल चौहान, मोहित उल्वा, आर्यन सावसानी, काव्या पटेल, इशान सूद

अंडर १९ अफगाणिस्तान संघ

आबिदुल्ला नादरजान, फरीदुल्ला एहसास, सुभान जखैल, नोमान सलारझाई (यष्टीरक्षक), शाह फैसल रहीमी, ताहिर सरवारी, अमीर हमझा, सोहेल खान (कर्णधार), मोहम्मद अली, बिलाल सलिमानखिल, नूर अली नियाझी

RESULT | INDIA U19 WON BY 8 WICKETS India U19 secured an 8-wicket victory in the semi-final, bringing Afghanistan Future Stars’ campaign to a close. Earlier in the tournament, Afghanistan Future Stars topped Group B with three consecutive victories over Bangladesh, Malaysia and Sri Lanka U19, before facing India U19 in the second semi-final. #U19AsiaCup

— Afghanistan Cricket Board (@ACBofficials) November 12, 2026