नवी दिल्ली : अंडर 19 आशिया कप २०२६ सध्या ओमानमध्ये सुरू आहे. या स्पर्धेत आठ संघांनी सहभाग घेतला होता. यापैकी चार संघ पुढे पोहोचले आहेत तर उर्वरित चार संघांचा प्रवास लीग टप्प्यानंतर संपला आहे. स्पर्धेतून बाहेर पडलेल्या संघांमध्ये यूएई, नेपाळ, श्रीलंका आणि मलेशिया यांचा समावेश आहे. दुसरीकडे, भारत, पाकिस्तान, बांगलादेश आणि अफगाणिस्तान यांनी सेमी-फायनल प्रवेश केला आहे.

गट 'अ' मधून पाकिस्तान आणि भारत यांनी उपांत्य फेरीत आपले स्थान निश्चित केले आहे. तर गट 'ब' मधून अफगाणिस्तान आणि बांगलादेश यांनी अव्वल चार संघांमध्ये स्थान मिळवले आहे. उपांत्य फेरीची रचना अशा प्रकारे करण्यात आली आहे की वेगवेगळ्या गटांतील संघ एकमेकांशी भिडतील. त्यामुळे उपांत्य फेरीत भारत आणि पाकिस्तान यांच्यात सामना होणार नाही. त्याऐवजी, भारत अफगाणिस्तानविरुद्ध खेळेल तर पाकिस्तानचा सामना बांगलादेशशी होईल. दोन्ही उपांत्य सामने गुरुवार, १२ नोव्हेंबर रोजी होणार आहेत.

पहिला उपांत्य सामना पाकिस्तान आणि बांगलादेश यांच्यात 'अल अमरात क्रिकेट ग्राउंड'वरील 'मिनिस्ट्री टर्फ १' वर खेळवला जाईल तर दुसरा सामना भारत आणि अफगाणिस्तान यांच्यात त्याच वेळी 'टर्फ २'वर होईल. जर पाकिस्तानने बांगलादेशला आणि भारताने अफगाणिस्तानला पराभूत केले, तर हे दोन पारंपरिक प्रतिस्पर्धी अंतिम सामन्यात एकमेकांसमोर येऊ शकतात.

अंडर 19 आशिया कप २०२६ चा अंतिम सामना एक दिवसाच्या विश्रांतीनंतर 'अल अमरात क्रिकेट ग्राउंड'वरील 'टर्फ २' वर खेळवला जाईल. उपांत्य फेरीचे सामने आणि अंतिम सामना हे सर्व सामने स्थानिक वेळेनुसार सकाळी ९ वाजता सुरू होतील. भारतीय प्रमाणवेळेनुसार सकाळी १०:३० वाजता सुरू होतील.