
रांची : रेल्वेच्या निष्काळजीपणाचे एक गंभीर प्रकरण समोर आले आहे. २४ ऑक्टोबर रोजी झारखंड ते उत्तर प्रदेश दरम्यान एक रिकामी 'वंदे भारत' ट्रेन सुमारे ४६३ किलोमीटर अंतरापर्यंत कोणतीही कार्यक्षम ब्रेक सिस्टिम नसताना धावली. ही सुरक्षेतील एक गंभीर त्रुटी आहे. ही रिकामी ट्रेन एका मालवाहू इंजिनाद्वारे हटिया येथून झाशीकडे नेली जात होती.
प्रसारमाध्यमांवर मिळालेल्या माहितीनुसार, प्रवासादरम्यान दोन लोको पायलटनी ब्रेक नीट काम करत नसल्याची माहिती दिली होती. तरीही ट्रेनला पुढे जाण्याची परवानगी देण्यात आली. सुदैवाने, ट्रेनमध्ये प्रवासी नव्हते. अन्यथा, एक मोठा अपघात घडू शकला असता. या घटनेची आता चौकशी सुरू करण्यात आली आहे.
प्रकरणाचे गांभीर्य लक्षात घेता दक्षिण पूर्व रेल्वेने चौकशीचे आदेश दिले आहेत. प्राथमिक तपासात डब्यांच्या देखभालीसाठी जबाबदार कर्मचारी, तसेच नियंत्रक आणि रेल्वे कर्मचारी वर्गाकडून निष्काळजीपणा झाल्याचे समोर आले आहे. रेल्वेच्या म्हणण्यानुसार, गाडीच्या सर्व डब्यांमधील ब्रेक काढून टाकण्यात आले होते त्यामुळे ते निकामी झाले होते.
अधिकाऱ्यांच्या माहितीनुसार, २४ ऑक्टोबर रोजी हटिया येथून झाशीकडे एक रिकामी 'वंदे भारत' रेक नेण्याचे नियोजन होते. ही गाडी मालगाडीच्या इंजिनाद्वारे ओढली जात होती. हटिया येथून निघाल्यानंतर लोको पायलट यांनी ब्रेक तपासले असता त्यांची कार्यक्षमता अत्यंत कमी असल्याचे त्यांच्या लक्षात आले.
रांची स्थानकावर पोहोचल्यावर त्यांनी या समस्येबाबत 'सेक्शन कंट्रोलर' आणि 'ट्रॅक्शन लोको कंट्रोलर' यांच्याकडे लेखी तक्रार नोंदवली. असे असूनही गाडीला पुढे जाण्याची परवानगी देण्यात आली. त्यानंतर, मुरी स्थानकावर गाडीचा ताबा घेणाऱ्या दुसऱ्या लोको पायलट यांनीही ब्रेक नीट काम करत नसल्याचे कळवले. मात्र, त्यांच्या तक्रारीवरही कोणतीही कारवाई करण्यात आली नाही.
उत्तर प्रदेशातील चंदौली जिल्ह्यात असलेल्या दीन दयाल उपाध्याय स्थानकावर जेव्हा ट्रेन पोहोचली तेव्हा रेल्वे कर्मचाऱ्यांनी तिची तपासणी केली. सुमारे ४६३ किलोमीटरच्या या प्रवासादरम्यान रेल्वे केवळ मालवाहू लोकोमोटिव्हच्या ब्रेकवर आणि त्याच्या 'रिजनरेटिव्ह ब्रेकिंग' प्रणालीवर अवलंबून पुढे जात राहिली.
ताजी बातमी
View all




संबंधित बातम्या
View all








