नवी दिल्ली : भारतातील प्रमुख फिनटेक कंपन्यांपैकी एक असलेली 'रेझरपे' आता शेअर बाजारात आपला आयपीओ घेऊन येणार आहे. कंपनीला त्यांच्या 'इनिशियल पब्लिक ऑफरिंग'साठी सेबीची मंजुरी मिळाली आहे. आयपीओ जाहीर झाल्यानंतर ऑफरची किंमत, शेअर्सची संख्या आणि इतर आर्थिक माहिती उघड केली जाईल. यामुळे गुंतवणूकदारांना कंपनीच्या आयपीओमध्ये गुंतवणूक करण्याशी संबंधित जोखीम आणि संभाव्य संधी अधिक चांगल्या प्रकारे समजून घेता येतील.

बेंगळुरूस्थित रेझरपे आपल्या आयपीओद्वारे सुमारे ५,५०० कोटी ते ६,५०० कोटी रुपये उभारण्याची तयारी करत आहे. सूत्रांनुसार, कंपनीचे व्हॅल्यूएशन सुमारे ५ अब्ज डॉलर्स गाठण्यावर लक्ष केंद्रीत केले आहे. रेझरपे कोणत्या किमतीवर बाजारात प्रवेश करेल आणि त्यांचा आयपीओ गुंतवणूकदारांसाठी कोणती संधी घेऊन येईल याकडे सर्वांचे लक्ष लागले आहे. 

रेझरपेचा आयपीओ भारतीय फिनटेक क्षेत्रासाठी एक महत्त्वाचा टप्पा ठरू शकतो. कंपनीच्या महसूलामध्ये वेगाने वाढत होत असून डिजिटल पेमेंट बाजारपेठेत कंपनीचे स्थान अत्यंत भक्कम आहे.  मे २०२५ मध्ये, रेझरपेने आपली 'रिव्हर्स-फ्लिप' प्रक्रिया पूर्ण केली. यामध्ये कंपनीच्या मूळ घटकाचे मुख्यालय अमेरिकेतून भारतात हलवण्यात आले. या प्रक्रियेचा भाग म्हणून अमेरिकेत नोंदणीकृत असलेली मूळ कंपनी भारतीय युनिट 'रेझरपे सॉफ्टवेअर इंडिया प्रायव्हेट लिमिटेड'मध्ये विलीन करण्यात आली. भारतीय शेअर बाजारात सूचीबद्ध होण्याच्या योजनेचा भाग म्हणून कंपनीने मे २०२३ मध्ये ही प्रक्रिया सुरू केली होती. रेझरपे आता एआय-आधारित पेमेंट सेवांवर लक्ष केंद्रित करत आहे.

रेझरपे केवळ आपल्या सध्याच्या डिजिटल पेमेंट व्यवसायापुरतेच मर्यादित राहण्याचा विचार करत नाहीये. "आगामी काळात एआय लोकांच्या खरेदी करण्याच्या आणि पैसे भरण्याच्या पद्धतीत आमूलाग्र बदल घडवून आणू शकते. ज्याप्रमाणे यूपीआयने भारतातील डिजिटल पेमेंट क्षेत्रात क्रांती घडवून आणली होती. त्यांच्या मते, एआय-आधारित पेमेंट सिस्टिम स्वीकारली जाण्यासाठी काही काळ लागू शकतो, परंतु पुढील पाच वर्षांत ऑनलाइन व्यापारासाठी हे एक प्रमुख माध्यम म्हणून समोर येऊ शकते." असे सह-संस्थापक आणि मुख्य कार्यकारी अधिकारी हर्षिल माथूर यांनी म्हटले. 

(डिस्क्लेमर : माहिती शेअर करण्याच्या उद्देशाने हा लेख देण्यात आला आहे. गुंतवणुकीचा सल्ला या लेखात देण्यात आलेला नाही. शेअर बाजारात गुंतवणूक करताना जोखीम असते. त्यामुळे स्वतःच्या जोखमीवर शेअर बाजारात गुंतवणुक करा. गुंतवणूक करण्याआधी संबंधित क्षेत्रातील तज्ज्ञांचा सल्ला घ्यावा...)