नवी दिल्ली : कोल इंडिया लिमिटेडची उपकंपनी असलेल्या 'साउथ ईस्टर्न कोलफील्ड्स लिमिटेड'ने बाजार नियामक 'सेबी'कडे 'इनिशियल पब्लिक ऑफरिंग'साठी कागदपत्रे दाखल केली आहेत. १ नोव्हेंबर रोजी दाखल करण्यात आलेल्या 'ड्राफ्ट रेड हेरिंग प्रॉस्पेक्टस'नुसार, प्रस्तावित आयपीओ पूर्णपणे 'ऑफर फॉर सेल' स्वरूपाचा असेल. यामध्ये कंपनीचे प्रमोटर 'कोल इंडिया', ६६.८१ कोटींपर्यंतचे इक्विटी शेअर्स विक्रीसाठी उपलब्ध करून देतील. याद्वारे कोणतेही नवीन शेअर्स गुंतवणूकीसाठी जारी केले जाणार नाहीत. हा आयपीओ पूर्णपणे 'ऑफर फॉर सेल' असल्याने त्यातून मिळणारी संपूर्ण रक्कम 'कोल इंडिया'ला मिळेल आणि 'एसईसीएल'ला कोणताही निधी मिळणार नाही.

१९८५ मध्ये स्थापित आणि छत्तीसगडमधील बिलासपूर येथे मुख्यालय असलेली 'एसईसीएल' ही देशातील सर्वात मोठ्या कोळसा उत्पादक कंपन्यांपैकी एक आहे. कागदपत्रांनुसार, कंपनीने २०२५-२६ या आर्थिक वर्षात १७.६२ कोटी टन कोळशाचे उत्पादन केले. जे देशाच्या एकूण कोळसा उत्पादनाच्या १६.९४ टक्के इतके आहे.

सोमवारी 'कोल इंडिया'चे शेअर्स बीएसईवर ३९७.५० रुपयांवर ओपन होईल. दिवसाच्या सत्रात शेअरची किंमत ४०७.८० रुपयांच्या उच्चांकी पातळीवर पोहोचली होती. बाजार बंद होताना हा शेअर ४ टक्क्यांहून अधिक वाढीसह ४०७.४० रुपयांवर ट्रेड करत होता. गेल्या वर्षभरात या शेअरच्या किमतीत ४.८१ टक्क्यांची वाढ झाली आहे.

'कोल इंडिया'चे शेअर्स ४ नोव्हेंबर रोजी 'एक्स-डिव्हिडंड' होणार आहेत. कंपनीने प्रति शेअर १०.२५ रुपयांचा अंतरिम डिव्हीडंट देण्याचा निर्णय घेतला आहे. यापूर्वी, सप्टेंबर महिन्यात कंपनीचे शेअर्स 'एक्स-डिव्हिडंड' झाले होते. तेव्हा योग्य गुंतवणूकदारांना प्रति शेअर ५.२५ रुपयांचा फायनल डिव्हिडंड देण्यात आला होता.