मुंबई : सणासुदीचा काळ आणि ग्राहकांची वाढती गर्दी लक्षात घेता, युपीआय (UPI) द्वारे व्यवहार स्वीकारणाऱ्या व्यापाऱ्यांसाठी एक आनंदाची बातमी समोर आली आहे. 'नॅशनल पेमेंट्स कॉर्पोरेशन ऑफ इंडिया'च्या (NPCI) 'UPI आणि सेवा सुकाणू समिती'ने काही विशिष्ट व्यापारी व्यवहारांवर 'मर्चंट डिस्काउंट रेट' (MDR) लागू करण्याचा निर्णय दिवाळीनंतरपर्यंत पुढे ढकलला आहे.

सामान्यांना कोणताही भुर्दंड नाही

एनपीसीआयने स्पष्ट केले आहे की, हा MDR नियम केवळ काही विशिष्ट व्यापारी व्यवहारांसाठी लागू असणार असून, सामान्य नागरिकांकडून दैनंदिन व्यवहारांसाठी केल्या जाणाऱ्या सर्वसामान्य UPI व्यवहारांवर याचा कोणताही परिणाम होणार नाही. त्यामुळे सामान्य जनतेला या शुल्कातून पूर्णपणे दिलासा मिळाला आहे.

नवीन तारीख लवकरच जाहीर होणार

सध्या फेस्टिव्ह सीजन सुरू असल्याने व्यापाऱ्यांना तात्पुरता दिलासा देण्याचा हा निर्णय घेण्यात आला आहे. दरम्यान, हा नियम किंवा MDR कधीपासून लागू केला जाणार, याबाबतची नवीन तारीख एनपीसीआयद्वारे स्वतंत्रपणे जाहीर केली जाईल, अशी माहिती देण्यात आली आहे.