मुंबई : भाजप नेते केंद्रीय मंत्री नारायण राणे यांनी मनसेप्रमुख राज ठाकरे यांची भेट घेतली. नारायण राणे थोड्याच वेळापूर्वी राज ठाकरे यांच्या निवासस्थानी दाखल झाले. यावेळी नारायण राणे यांच्यासोबत त्यांच्या पत्नी नीलम राणे सुद्धा उपस्थित होत्या. राज ठाकरे आणि नारायण राणे यांच्या भेटीमुळे राजकीय वर्तृळात चर्चेला उधाण आलं आहे. आजच्या भेटीमध्ये दोन्ही नेत्यांमध्ये नेमकी काय चर्चा झाली, हे अद्याप समोर आलेलं नसलं तरी मुंबई महापालिका निवडणुकीच्या पार्श्वभूमीवर ही भेट महत्त्वाची मानली जात.
मुंबईसह राज्यातील अनेक महानगरपालिकांच्या निवडणुका आगामी काळात होणार आहेत. भाजपाने आपलं सर्व लक्ष आता मुंबई महापालिकेवर केंद्रीत केलं आहे. मुंबई महापालिका निवडणुकीसाठी भाजप आणि बाळासाहेबांची शिवसेना यांची युती होण्याची शक्यता आहे. सोबतच मनसे देखील युतीत सहभागी होणार असल्याची चर्चा आहे. त्यामुळे आज नारायण राणे यांनी राज ठाकरे यांची भेट घेतल्यानंतर पुन्हा एकदा युतीच्या चर्चेला सुरुवात झाली आहे.
