नाशिक : येथून जवळच असलेल्या त्र्यंबकेश्वरमधून एक धक्कादायक घटना समोर आली आहे. नाशिक येथील प्रेमीयुगुलाने त्र्यंबकेश्वर येथील लॉजमध्ये आत्महत्या केल्याची घटना उघडकीस आली आहे.युवतीला रात्रीच्या वेळेला उलट्या होत असल्यामुळे ती खोलीच्या बाहेर आली. यावेळी हॉटेलमधील रूम बॉयने खोलीमध्ये डोकावून पाहिले असता खोलीत विषारी औषध असलेली बाटली दिसली. त्यामुळे रूम बॉयला धक्काच बसला आणि या प्रेमीयुगुलांनी आत्महत्या करण्यासाठी औषध पिल्याचे लक्षात आले. त्या दोघांनाही तातडीने रुग्णालयात दाखल करण्यात आले. मात्र त्यांचा उपचारादरम्यान मृत्यू झाला.
त्र्यंबकेश्वर येथील प्रीतम लॉज येथे गुरुवार दि. १५ रोजी नाशिक येथील तानाजी रामराव चौधरी (वय ४०, रा. गांधीनगर) आणि रूपाली महेश जाधव (वय ३५, रा. जाधव संकुल, सातपूर) यांनी आम्ही पती-पत्नी असून येथे धार्मिक विधी करायचा आहे, असे सांगत स्वतःचे आधारकार्ड व पॅनकार्ड देऊन लॉजची रूम बुक केली होती.
त्र्यंबकेश्वर पोलीस ठाण्यात याबाबत अकस्मात मृत्यूची नोंद करण्यात आली आहे. वरिष्ठ पोलीस निरीक्षक संदीप रणदिवे यांनी घटनास्थळी भेट दिली. आत्महत्येचे कारण अद्याप समजू शकले नाही.
