देवगड : सिंधुदुर्ग जिल्हा परिषदेच्या मुख्य कार्यकारी अधिकारी डॉ. अपूर्वा बासुर यांच्या मार्गदर्शनाखाली विकसित भारत रोजगार हमी व आजीविका मिशन (ग्रामीण) योजनेअंतर्गत देवगड तालुक्यात ‘घर तेथे शोषखड्डा’ अभियानाचा शुभारंभ करण्यात आला. या अभियानांतर्गत कुणकेश्वर ग्रामपंचायत हद्दीत शोषखड्डा उभारणीच्या कामाचे भूमिपूजन माजी सरपंच महेश ताम्हणकर यांच्या हस्ते करण्यात आले.

यावेळी ग्रामपंचायत अधिकारी गुणवंत पाटील, तांत्रिक सहाय्यक सोनजी जोगळ, ग्रामरोजगार सहाय्यक मंगेश मेस्त्री आणि लाभार्थी सुभाष वाळके उपस्थित होते. शोषखड्डे व जलधारा यांसारख्या जलसंधारणाच्या कामांमुळे पावसाचे पाणी जमिनीत मुरण्यास मदत होणार आहे. परिणामी भूजल पातळीत वाढ होण्यास हातभार लागून भविष्यातील पाणीटंचाईची तीव्रता कमी करण्यास मदत होईल.

गावाच्या विकासासोबतच नैसर्गिक जलस्रोतांचे संवर्धन आणि पाणीसमस्येवर दीर्घकालीन उपाययोजना करण्याच्या दृष्टीने या अभियानाला महत्त्व आहे. देवगड तालुक्यात पंचायत समितीच्या वतीने ‘घर तेथे शोषखड्डा’ ही मोहीम राबविण्यात येत असून, जलसंधारणाची कामे प्रत्येक गावात प्रभावीपणे करण्यावर भर दिला जात आहे.