सावंतवाडी : शहरात गेल्या दोन ते तीन दिवसांपासून एमएनजीएल घरगुती गॅस कनेक्शनच्या नावाखाली नागरिकांची आर्थिक फसवणूक होत आहे. मोबाईलवर येणारे बनावट संदेश आणि फोन कॉलद्वारे ओटीपी मागवून नागरिकांच्या बँक खात्यातून परस्पर पैसे काढले जात आहेत. या प्रकरणी सावंतवाडी पोलिसांकडून नागरिकांना सतर्क राहण्याचे आवाहन करण्यात आले आहे.

शहरात मागील काही दिवसांपासून नागरिकांना घरगुती गॅस कनेक्शनबाबत विविध मोबाईल संदेश आणि फोन कॉल येत आहेत. या माध्यमातून नागरिकांकडे गोपनीय ओटीपीची मागणी केली जात असून या भूलथापांना बळी पडल्यामुळे  सावंतवाडी शहरातील दोन ते तीन नागरिकांची आर्थिक फसवणूक झाली आले आहे. या गंभीर प्रकारची दखल घेत सावंतवाडी नगरपरिषदेचे उपनगराध्यक्ष ॲड. अनिल निरवडेकर यांच्या नेतृत्वाखाली सावंतवाडी पोलीस ठाण्यात लेखी निवेदन सादर करण्यात आले.

या निवेदनानुसार, सावंतवाडी शहरात एमएनजीएल घरगुती गॅस कनेक्शनबाबत सध्या कोणतीही अधिकृत सेवा कार्यान्वित करण्यात आलेली नाही, असे स्पष्ट करण्यात आले आहे. एमजीएल गॅस कनेक्शनबाबत येणाऱ्या कोणत्याही अनोळखी कॉल किंवा मेसेजवर विश्वास ठेवू नका, कोणत्याही अनोळखी व्यक्तीला आपला ओटीपी, बँक खात्याची माहिती, एटीएम कार्ड तपशील किंवा इतर गोपनीय माहिती शेअर करू नका.

गॅस कनेक्शन सुरू किंवा बंद करण्याच्या नावाखाली कोणी पैसे किंवा ओटीपी मागितल्यास अजिबात प्रतिसाद देऊ नका तसेच संशयास्पद लिंकवर क्लिक करणे किंवा अनोळखी ॲप्स मोबाईलमध्ये डाउनलोड करणे टाळा अशा प्रकारच्या कोणत्याही सुविधा किंवा आमिषाबाबत स्थानिक कार्यालयात जाऊन खात्री करा असे आवाहन करण्यात आले आहे.

नागरिकांनी कोणत्याही भूलथापांना किंवा धमक्यांना न जुमानता सतर्कता बाळगावी, असे आवाहन सावंतवाडी पोलिसांनी केले आहे. दरम्यान, सायबर गुन्ह्याला बळी पडल्यास नागरिकांनी तात्काळ '१९३०' या हेल्पलाईन क्रमांकावर संपर्क साधावा किंवा www.cybercrime.gov.in या संकेतस्थळावर आपली तक्रार नोंदवावी, असे सावंतवाडी पोलीस ठाण्याच्या वतीने कळविण्यात आले आहे.