वेंगुर्ला : जिल्हा परिषद सिंधुदुर्गच्या आरोग्य विभागाच्या वतीने ‘सिंधू जनसंवाद आरोग्य यात्रा’ या उपक्रमाचा शुभारंभ सोमवार, २ नोव्हेंबर २०२६ रोजी सकाळी ११ वाजता रेडी येथील प्राथमिक आरोग्य केंद्रात होणार आहे. या उपक्रमाच्या माध्यमातून नागरिकांना आरोग्य तपासणीसह विविध शासकीय आरोग्य योजनांचा लाभ मिळवून देण्याचा प्रयत्न केला जाणार आहे.

महाराष्ट्र राज्याचे मत्स्यव्यवसाय व बंदरे विकासमंत्री तथा सिंधुदुर्गचे पालकमंत्री नितेश राणे यांच्या हस्ते या कार्यक्रमाचा शुभारंभ होणार असून आमदार दीपक केसरकर यांची प्रमुख उपस्थिती राहणार आहे. ‘सुदृढ परिवार, निरोगी समाज, सक्षम सिंधुदुर्ग’ हे ब्रीद घेऊन आयोजित करण्यात आलेल्या या आरोग्य यात्रेतून ग्रामीण भागातील नागरिकांपर्यंत आरोग्य सेवा पोहोचविण्यावर भर दिला जाणार आहे.

या आरोग्य यात्रेदरम्यान नागरिकांची आरोग्य तपासणी करण्यात येणार असून, आयुष्मान भारत कार्ड, ज्येष्ठ नागरिकांसाठी वयवंदना कार्ड आणि डिजिटल आरोग्य नोंदींसाठी आभा कार्ड यांसंबंधी सुविधा उपलब्ध करून दिल्या जाणार आहेत. याशिवाय नागरिकांना विविध शासकीय आरोग्य योजनांची माहिती देऊन आरोग्यविषयक जनजागृती केली जाणार आहे. या कार्यक्रमाला खासदार नारायण राणे, जिल्हा परिषद अध्यक्ष प्रमोद कामत यांच्यासह जिल्हा परिषद सदस्य, पंचायत समिती पदाधिकारी, आरोग्य विभागाचे अधिकारी आणि कर्मचारी उपस्थित राहणार आहेत.

जिल्हा परिषद आरोग्य विभागाच्या वतीने आयोजित या उपक्रमांतर्गत ग्रामपंचायत रेडी, सेंट्रल ग्रामपंचायत प्राथमिक शाळा रेडी क्रमांक १, अंगणवाडी रेडी क्रमांक १, श्री माऊली विद्यालय माध्यमिक शाळा रेडी आणि सेंट्रल प्रायमरी स्कूल शिरोडा येथे भेटी देण्याचे नियोजन करण्यात आले आहे.

नागरिकांना सहभागी होण्याचे आवाहन ग्रामीण भागातील नागरिकांना आरोग्यविषयक सेवा सहज उपलब्ध व्हाव्यात, विविध योजनांचा लाभ मिळावा आणि आरोग्याबाबत जागरूकता निर्माण व्हावी, या उद्देशाने ही आरोग्य यात्रा राबविण्यात येत आहे. त्यामुळे रेडी व परिसरातील नागरिकांनी सोमवारी सकाळी ११ वाजता प्राथमिक आरोग्य केंद्र, रेडी येथे उपस्थित राहून या उपक्रमाचा लाभ घ्यावा, असे आवाहन जिल्हा परिषद आरोग्य व शिक्षण सभापती प्रितेश राऊळ यांनी केले आहे.