
सावंतवाडी : ज्यांच्या भारदस्त आवाजाने आणि जबरदस्त अभिनयाने कोकणातील दशावतारी रंगमंच थरथरायचा आणि खलनायकाच्या भूमिकेतही प्रेक्षकांच्या डोळ्यांतून कौतुकाचे पाणी आणायचे, अशा एका दिग्गज कलाकाराची ही गोष्ट आहे. कोकणातील मालवण देवबाग येथील ज्येष्ठ आणि प्रसिद्ध दशावतारी कलाकार महादेव सहदेव उर्फ जीजी चोडणकर यांनी १६ नोव्हेंबर २०२६ रोजी वयाच्या ८१ व्या वर्षी त्यांनी या जगाचा निरोप घेतला. पण त्यांची कला आजही रसिकांच्या मनात कायम आहे.
पाच ते सहा दशकांहून अधिक काळ त्यांनी कोकणाच्या या पारंपरिक लोककलेची सेवा केली. कोणत्याही लेखी संहितेशिवाय, केवळ अंगात भिनलेल्या कलेच्या बळावर उत्स्फूर्त संवादफेक, नृत्य आणि गायनाचा अनोखा संगम त्यांनी घडवला. कै. बाबी कलिंगण यांच्या 'कलेश्वर दशावतार' मंडळासोबत त्यांनी काम केले.
मुख्यत्वे 'खलनायक' आणि 'राक्षसाच्या' भूमिकांसाठी ते ओळखले जात असले, तरी त्यांची ‘जांबुवंत’ ही भूमिका प्रचंड गाजली. याशिवाय ' आर्य चाणक्य’ यांसारख्या गंभीर भूमिकाही त्यांनी लीलया पेलल्या. त्यांच्या भारदस्त आवाजाने संपूर्ण नाट्यगृह दुमदुमून जायचे. दशावतार लोककलेच्या संवर्धनासाठी त्यांनी दिलेल्या या अमूल्य योगदानाची दखल घेत त्यांना अनेक प्रतिष्ठित पुरस्कारांनी गौरवण्यात आले.
झी गौरव पुरस्कार, माझा लोकराजा महोत्सव सन्मान, आणि राज्यस्तरीय सिंधुरत्न पुरस्कार (२०२०) नवोदित कलाकारांसाठी ते केवळ मार्गदर्शक नव्हे, तर दशावतार परंपरेचे एक 'चालतेबोलते विद्यापीठ' होते. कोकणाच्या या महान भूमिपुत्राला आमची भावपूर्ण श्रद्धांजली.
संकलन - स्वप्निल परब
मुख्य उपसंपादक, दै. कोकणसाद
ताजी बातमी
View all




संबंधित बातम्या
View all








