देवगड : वाडातर येथे गोवा बनावटीची दारू बेकायदेशीररीत्या विक्री करण्याच्या उद्देशाने बाळगल्याप्रकरणी संशयित विरेंद्र वासुदेव जाधव (५०, रा. वाडा मूळबांध) याच्याविरुद्ध देवगड पोलीस ठाण्यात गुन्हा दाखल करण्यात आला आहे. सिंधुदुर्ग स्थानिक गुन्हे अन्वेषण विभागाच्या पथकाने २९ ऑक्टोबर रोजी सायंकाळी ६ वाजण्याच्या सुमारास ही कारवाई केली.

पोलिसांनी दिलेल्या माहितीनुसार, स्थानिक गुन्हे अन्वेषण विभागाच्या पथकाने वाडातर येथे छापा टाकला असता, कांबळी स्टोअरच्या बाजूला संशयित विरेंद्र जाधव याच्याकडे सुमारे १२ हजार रुपये किमतीची गोवा बनावटीची दारू आढळून आली. ही दारू बेकायदेशीररीत्या, कोणताही परवाना नसताना विक्रीच्या उद्देशाने बाळगल्याचे निदर्शनास आल्याने त्याच्याविरुद्ध कायदेशीर कारवाई करण्यात आली. याप्रकरणी स्थानिक गुन्हे अन्वेषण विभागाचे पोलीस हवालदार अविनाश अर्जुन ओटवणेकर यांनी फिर्याद दिली आहे. या घटनेचा पुढील तपास सहाय्यक पोलीस उपनिरीक्षक मनोज राऊत करीत आहेत.