
सिंधुदुर्ग : कुडाळ शहराच्या पानबाजार परिसरातील स्टेट बँक ऑफ इंडियाच्या शाखेत आज दुपारी ३ वाजण्याच्या सुमारास चाकूचा धाक दाखवून दरोडा टाकल्याची खळबळजनक घटना घडली. एका तरुण संशयिताने बँकेतील महिला कर्मचाऱ्याला चाकूचा धाक दाखवून लाखो रुपयांची रोकड लांबवली. मात्र बँक कर्मचारी आणि सतर्क नागरिकांच्या धाडसामुळे हा दरोडा उधळून लावला गेला. पळून जाण्याचा प्रयत्न करणाऱ्या संशयित दरोडेखोराला नागरिकांनी शिताफीने पकडून चांगलाच चोप दिला आणि नंतर पोलिसांच्या स्वाधीन केले.
प्राप्त माहितीनुसार, दुपारी ३ वाजण्याच्या सुमारास एक तरुण संशयित कुडाळ पानबाजार येथील स्टेट बँक ऑफ इंडियाच्या शाखेत कस्टमरच्या वेषात घुसला. त्याने अत्यंत चलाखीने बँकेतील महिला कर्मचाऱ्याला चाकूचा धाक दाखवला आणि भीतीचे वातावरण निर्माण करत कॅश काउंटरवरील लाखो रुपयांची रोकड बळकावली. रोकड हाताशी येताच संशयिताने तिथून पळ काढला.
संशयित तरुण रोकड घेऊन पळत सुटत असतानाच बँक कर्मचाऱ्यांनी आरडाओरडा केला. या आवाजाने बँकेबाहेरील आणि परिसरातील नागरिक तातडीने सतर्क झाले. नागरिकांनी आणि उपस्थितांनी कोणतीही वेळ न घालवता त्वरित पाठलाग करत त्या संशयित दरोडेखोराला जेरबंद केले. संतप्त नागरिकांनी या चोराला चांगलाच चोप देत त्याच्या ताब्यातील लुटलेली रोकड जप्त केली आणि नंतर त्याला कुडाळ पोलिसांच्या हवाले केले.
घटनेची माहिती मिळताच कुडाळ पोलीस ठाण्याचे पोलीस निरीक्षक विकास बडवे, उपनिरीक्षक प्रमोद काळसेकर आणि त्यांचे पोलीस पथक तातडीने घटनास्थळी दाखल झाले.
पोलिसांनी घटनास्थळाची पाहणी करून संशयिताला ताब्यात घेतले आहे. प्राथमिक तपासात या गुन्ह्यात आणखी एका संशयिताचा सहभाग असण्याची दाट शक्यता वर्तवली जात असून, पोलीस त्या दुसऱ्या संशयिताचा कसून शोध घेत आहेत.
दिवसाढवळ्या घडलेल्या या थरारक घटनेमुळे कुडाळ शहरात मोठी खळबळ उडाली असून नागरिकांमधून भीतीसह संताप व्यक्त होत आहे. कुडाळ पोलिसांकडून या प्रकरणाचा सखोल तपास सुरू आहे.
ताजी बातमी
View all




संबंधित बातम्या
View all








