नवी दिल्ली : जम्मू-काश्मीरमधील कुलगाम येथे बुधवारी दहशतवादी हल्ला झाला. दहशतवाद्यांनी सीआरपीएफच्या गस्ती पथकावर गोळीबार केला. यामध्ये तीन जवान जखमी झाले आहेत. वृत्तसंस्था एएनआयनुसार, बुधवारी दुपारी कुलगाम जिल्ह्यात एका तपासणी नाक्यावर तैनात असलेल्या सीआरपीएफ जवानांवर अज्ञात हल्लेखोरांनी गोळीबार केला. यात तीन जवान जखमी झाले. ही घटना दुपारी सव्वा दोनच्या सुमारास घडली.

अज्ञात हल्लेखोर मोटारसायकलवरून आले होते आणि गोळीबार केल्यानंतर तेथून पळून गेले. जखमी जवानांना अनंतनाग जिल्ह्यातील रुग्णालयात दाखल करण्यात आले असून तिथे त्यांच्यावर उपचार सुरू आहेत. हल्ल्यानंतर संपूर्ण परिसर त्वरित सील करण्यात आला. लष्कर आणि पोलिसांनी हल्लेखोरांचा शोध सुरू केला असून त्यांना पकडण्यासाठी आसपासच्या परिसरात शोधमोहीम राबवली जात आहे.