राजापूर : मुंबई विद्यापीठाच्या वतीने आयोजित करण्यात आलेल्या आंतरमहाविद्यालयीन तायक्वांदो स्पर्धा २०२६-२७ मध्ये राजापूरची कन्या कु. रिया मुकेश मयेकर हिने उत्कृष्ट कामगिरी करत सुवर्णपदक पटकावले. रत्नागिरी एज्युकेशन सोसायटीच्या गोगटे-जोगळेकर महाविद्यालय (स्वायत्त), रत्नागिरी येथे २५ ते २८ ऑक्टोबर २०२६ या कालावधीत या स्पर्धेचे आयोजन करण्यात आले होते.

रिया सध्या खालसा महाविद्यालयात पदवीचे शिक्षण घेत असून, गेल्या आठ वर्षांपासून ती तायक्वांदो अकॅडमी, राजापूर येथे प्रशिक्षक मुकेश शांताराम नाचरे यांच्या मार्गदर्शनाखाली तायक्वांदोचे प्रशिक्षण घेत आहे. सातत्यपूर्ण सराव, खेळातील कौशल्य, जिद्द आणि कठोर मेहनतीच्या जोरावर तिने हे उल्लेखनीय यश संपादन केले आहे.

रिया हिच्या या यशाबद्दल खालसा महाविद्यालयाचे प्राचार्य, क्रीडा शिक्षक तसेच महाविद्यालयाचे प्रशिक्षक राजेश मुरव यांनी तिचे अभिनंदन केले.

तायक्वांदो अकॅडमी, राजापूरचे अध्यक्ष अभिजित जनार्दन तेली, उपाध्यक्ष मुकेश मयेकर, खजिनदार संजय मांडवकर, सदस्य दीपक धालवलकर, संदीप राऊत, प्रसाद शिवलकर, मानसी दिवटे, दीपिका पवार, अद्वैत अभ्यंकर, निलेश रहाटे तसेच महिला प्रशिक्षिका मधुरा नाचरे यांनीही रियाचे विशेष कौतुक करून पुढील वाटचालीस शुभेच्छा दिल्या.

तसेच तायक्वांदो असोसिएशन ऑफ महाराष्ट्राचे कोषाध्यक्ष व्यंकटेश्वर कररा, सचिव सुभाष पाटील, जिल्हा उपाध्यक्ष शैलेश गायकवाड, विश्वदास लोखंडे, सचिव लक्ष्मण कररा, कोषाध्यक्ष शशांक घडशी आणि तायक्वांदो अकॅडमी, राजापूर परिवाराच्या वतीने रियाचे अभिनंदन करण्यात आले.

दरम्यान, याच स्पर्धेत राजापूरच्या श्रुतिका विजय मांडवकर आणि आकाश योंगेद्र बरई यांची पंच म्हणून निवड करण्यात आली होती. रियाच्या सुवर्णपदकामुळे राजापूरच्या क्रीडा क्षेत्राच्या शिरपेचात आणखी एक मानाचा तुरा रोवला गेला असून, तिच्या यशाचे सर्वत्र कौतुक होत आहे.