नागोया : आशियाई क्रीडा स्पर्धेत शुक्रवारी भारताने शानदार सुरुवात केली आणि आणखी एक सुवर्णपदक जिंकले. नागगोया येथे भारतीय महिलांच्या 'रिकर्व्ह' तिरंदाजी संघाने उत्कृष्ट कामगिरी करत अंतिम सामना जिंकला आणि इतिहास घडवला.
आशियाई क्रीडा स्पर्धेतील या प्रकारात भारताचे हे पहिलेच सुवर्णपदक ठरले. विशेष म्हणजे, भारताने विद्यमान विश्वविजेत्या आधीच १० ऑलिम्पिक सुवर्णपदके जमा असलेल्या दक्षिण कोरियाच्या संघाचा ५-३ अशा फरकाने पराभव केला.
अंकिता भकत, कीर्ती शर्मा आणि कुमकुम मोहोड या भारतीय त्रिकुटाने १० वेळा ऑलिम्पिक विजेतेपद पटकावणाऱ्या दक्षिण कोरियाच्या संघावर मात केली. सोसाट्याच्या वाऱ्यात खेळल्या गेलेल्या या सामन्यातील पहिले दोन संच (सेट्स) बरोबरीत सुटले. या संचांमध्ये दोन्ही संघांनी अनुक्रमे ५४ आणि ५६ गुण मिळवले आणि गुण विभागून घेतले.
कांग चे-यंग, ओह ये-जिन आणि ली युन-जी या विश्वविजेत्या खेळाडूंचा समावेश असलेल्या कोरियन संघाची तिसऱ्या संचात घसरगुंडी उडाली. त्यांच्या तिरंदाजांनी सलग तीन वेळा '८' गुण मिळवले आणि त्यांना एकूण ५२ गुणच मिळवता आले, तर भारतीय तिरंदाजांनी ५५ गुण मिळवून तो संच आपल्या नावावर केला.
चौथ्या संचात दक्षिण कोरियाने ५४ गुण मिळवले. भारतासाठी कीर्तीने सुरुवातीला '८' गुण मिळवले होते, जे नंतर निर्णायकरीत्या '९' मध्ये बदलले गेले. यामुळे भारताची एकूण धावसंख्या ५४ झाली आणि तो संच बरोबरीत सुटला. या निकालासह भारतीय संघाने सुवर्णपदक निश्चित केले.
याआधी, उपांत्य फेरीत चीनचा ५-१ असा पराभव करून भारतीय संघाने पहिल्यांदाच आशियाई क्रीडा स्पर्धेची अंतिम फेरी गाठली होती. त्या उपांत्य सामन्यात भारताने पहिला संच ५३-५१ आणि दुसरा ५४-५२ असा जिंकला होता, तर तिसरा संच ५१-५१ असा बरोबरीत सुटला होता.
आशियाई क्रीडा स्पर्धेत भारतीय तिरंदाज आणि संघांनी प्रभावी कामगिरी केली आहे. तिरंदाजीमध्ये भारताने यापूर्वीच एक कांस्य आणि तीन सुवर्णपदके जिंकली होती. गणेश मणी रत्नम तिरुमुरू याने पुरुषांच्या 'कम्पाऊंड' वैयक्तिक प्रकारात कांस्यपदक जिंकले.
दरम्यान, साहिल जाधव, गणेश मणी रत्नम आणि कुशल दलाल यांनी पुरुषांच्या सांघिक प्रकारात सुवर्णपदक जिंकले. साहिल आणि चिकिता थन्नीपार्थी यांनी मिश्र सांघिक प्रकारात सुवर्णपदक पटकावले, तर ज्योती सुरेखा वेन्नम, पृथिका प्रदीप आणि चिकिता थन्नीपार्थी यांनी भारतीय महिलांच्या कंपाऊंड संघातर्फे सुवर्णपदक मिळवले.
