नवी दिल्ली : स्पेनमधून एक मोठी बातमी समोर आली आहे. बुधवारी सकाळी स्पेनच्या मध्यवर्ती भागात एक भीषण रेल्वे अपघात झाला. टोलेडो प्रांताजवळ दोन हाय-स्पीड रेल्वे गाड्यांची एकमेकांशी धडक झाली. स्पॅनिश प्रशासनाने या घटनेला दुजोरा दिला आहे. आतापर्यंत 10 जणांचा मृत्यू झाल्याची माहिती समोर येत आहे. अपघातात जखमींच्या नेमक्या संख्येबाबत अद्याप नेमकी आकडेवारी समजू शकलेली नाही. अपघातात अनेक प्रवासी जखमी झाल्याचे प्राथमिक अहवालांतून समोर आले आहे.

Consternado ante el grave accidente de trenes en Toledo. Permanezco en constante contacto con el ministro de Transportes, @oscar_puente_, y con el presidente de Castilla-La Mancha, @garciapage. Los servicios de emergencia están trabajando sobre el terreno para atender a las personas afectadas y garantizar su seguridad, en coordinación con todas las administraciones implicadas. Mi cariño, solidaridad y apoyo a todas las víctimas y sus familias.

— Pedro Sánchez (@sanchezcastejon) October 28, 2026

स्पेनच्या रेल्वे पायाभूत सुविधांचे व्यवस्थापन पाहणाऱ्या 'एडीआयएफ' (ADIF) या कंपनीने दिलेल्या माहितीनुसार, ही घटना बुधवारी सकाळी टोलेडो प्रांतात घडली. अपघातानंतर लगेचच माद्रिद, स्युदाद रियाल आणि आंदालुसिया दरम्यानची रेल्वे सेवा पूर्णपणे स्थगित करण्यात आली आहे. जोपर्यंत तपास पूर्ण होत नाही आणि रेल्वे मार्ग सुरक्षित असल्याचे घोषित केले जात नाही तोपर्यंत या मार्गांवर कोणतीही रेल्वे धावणार नाही असे अधिकाऱ्यांनी स्पष्ट केले आहे.

सरकारी प्रसारक संस्था 'टीव्हीई' (TVE) च्या वृत्तानुसार, दोन्ही गाड्या एकाच दिशेने जात असताना एका गाडीने दुसऱ्या गाडीच्या मागील भागाला धडक दिली. ही धडक इतकी जोरदार होती की एका गाडीचे दोन डबे रुळावरून घसरले. बचाव पथकांनी तातडीने घटनास्थळी पोहोचून जखमींना बाहेर काढण्याचे काम सुरू केले.

हा अपघात स्पेनच्या हाय-स्पीड रेल्वे नेटवर्कसाठी एक मोठा धक्का मानला जात आहे. विशेष म्हणजे, या वर्षाच्या जानेवारी महिन्यातही स्पेनच्या दक्षिण भागात एक भीषण अपघात झाला होता. यामध्ये एक रेल्वे रुळावरून घसरून समोरून येणाऱ्या दुसऱ्या गाडीवर आदळली होती. त्या घटनेत ४५ जणांचा मृत्यू झाला होता. २०१३ मध्ये झालेल्या रेल्वे अपघातानंतर ज्यात ८० जणांचा मृत्यू झाला होता ती स्पेनमधील ही सर्वात घातक घटना ठरली आहे.