सावंतवाडी : प्रकाशाचा उत्सव मानल्या जाणाऱ्या दिवाळी सणाची जय्यत तयारी सावंतवाडी शहर आणि परिसरात पाहायला मिळत आहे. सणाच्या पार्श्वभूमीवर मुख्य बाजारपेठ विविध वस्तूंनी सजली असून, खरेदीसाठी नागरिकांची गर्दी हळूहळू वाढू लागली आहे.

दिवाळीनिमित्त बाजारपेठेत रंगीबेरंगी आणि विविध आकारांचे आकर्षक आकाश कंदील दाखल झाले आहेत. पारंपरिक कागदी कंदील, कापडी, इको-फ्रेंडली तसेच आधुनिक डिझाईनच्या कंदिलांना ग्राहकांकडून पसंती दिली जात आहे. यासोबतच पारंपरिक पणत्या, विविध रंगांतील डिझायनर पणत्या, सुवासिक मेणबत्त्या आणि रांगोळीचे रंग विक्रीसाठी उपलब्ध झालेत.

घरांना आकर्षक रोषणाई करण्यासाठी बाजारात विविध प्रकारच्या एलइडी लाईट्स, सिरिज आणि विविध रंगांच्या लाईटिंग पट्ट्यांनी दुकाने उजळून निघाली आहेत. सुशोभिकरण साहित्यासोबतच कंदील आणि पणत्या खरेदीसाठी नागरिक उत्साहाने बाहेर पडत असून बाजारपेठेत सणाचा मोठा उत्साह पाहायला मिळत आहे. तसेच चमचमीत दिवाळी फराळ देखील दाखल व्हायला सुरुवात झाली आहे. स्थानिक व्यापारी आणि कारागिरांनी यंदा विविधतेवर भर दिला असून पुढील काही दिवसांत खरेदीचा हा उत्साह आणखी वाढणार आहे.