LPG e-KYC August 16 : जर तुम्ही घरी एलपीजी गॅस सिलेंडरचा वापर करीत असाल तर ही बातमी तुमच्यासाठी महत्त्वाची आहे. एलपीजी ग्राहकांना आता गॅस सिलेंडर बुक करण्यासाठी ई-केवायसी प्रक्रिया पूर्ण करावी लागणार आहे. ज्या ग्राहकांनी १६ ऑगस्टपर्यंत आपली ई-केवायसी पूर्ण केली नाही त्यांना गॅस सिलेंडर बुक करताना किंवा इतर सेवांचा लाभ घेताना अडचणी येऊ शकतात. जर तुम्ही अजूनही तुमची ई-केवायसी पूर्ण केली नसेल, तर ती त्वरित पूर्ण करणे गरजेचे आहे. चला तर मग यासाठी कोणती कागदपत्रांची गरज भासणार तसेच याची पूर्ण प्रक्रिया जाणून घेऊया.

सध्या एलपीजी ग्राहकांसाठी ई-केवायसीबाबत देशभरात मोहीम राबवली जात आहे. ज्या ग्राहकांनी १६ ऑगस्टपर्यंत ई-केवायसी पूर्ण केली नाही त्यांना गॅस सिलेंडर बुकिंग किंवा इतर संबंधित सेवांमध्ये समस्यांना सामोरे जावे लागू शकते. जर तुम्ही तुमच्या एलपीजी कनेक्शनसाठी बऱ्याच काळापासून केवायसी अपडेट केली नसेल किंवा तुमचा मोबाईल नंबर, पत्ता किंवा इतर तपशील बदलले असतील तर ई-केवायसी प्रक्रिया पूर्ण करण्याला प्राधान्य दिले पाहिजे. तसेच, ज्या ग्राहकांना त्यांच्या गॅस एजन्सीकडून एसएमएस किंवा फोनद्वारे ई-केवायसीबाबत सूचना मिळाल्या आहेत, त्यांनीही ही प्रक्रिया पूर्ण केल्याची खात्री करावी.

'ही' कागदपत्रे आवश्यक

१६ ऑगस्टपर्यंत ई-केवायसी पूर्ण केली नाही, तर गॅस एजन्सीला तुमचे रेकॉर्ड्स अपडेट करता येणार नाहीत. याचा परिणाम एलपीजी सिलेंडर बुकिंग, सबसिडीशी संबंधित सेवा आणि इतर सुविधांवर होऊ शकतो. त्यामुळे, गैरसोय टाळण्यासाठी ग्राहकांना ई-केवायसी प्रक्रिया वेळेवर पूर्ण करण्याचा सल्ला दिला जातो. ई-केवायसीसाठी तुम्हाला तुमचे आधार कार्ड, एलपीजी ग्राहक क्रमांक किंवा गॅस पासबुक, आधारशी लिंक केलेला मोबाईल क्रमांक, ओळखपत्र आणि पत्त्याचा पुरावा इत्यादी कागदपत्रांची आवश्यकता असते. ई-केवायसी पूर्ण करण्याचा सर्वात सोपा मार्ग म्हणजे तुमच्या गॅस एजन्सीला भेट देणे. एजन्सीचा प्रतिनिधी तुमचा आधार क्रमांक पडताळून पाहेल आणि आवश्यक असल्यास बायोमेट्रिक प्रमाणीकरणाद्वारे ई-केवायसी प्रक्रिया पूर्ण करेल. ही प्रक्रिया पूर्ण झाल्यावर तुमचे रेकॉर्ड्स अपडेट केले जातील.

ई-केवायसी ऑनलाइन करण्यासाठी प्रक्रिया

दरम्यान, ही प्रक्रिया ऑनलाइन करण्यासाठी, सर्वप्रथम तुमच्या गॅस कंपनीच्या (इंडेन, भारत गॅस किंवा एचपी गॅस) अधिकृत वेबसाइटवर किंवा मोबाइल ॲपवर लॉग इन करा. त्यानंतर, ई-केवायसी अपडेट सेक्शनमध्ये जा आणि तुमचा एलपीजी ग्राहक क्रमांक, नोंदणीकृत मोबाइल क्रमांक व आधार क्रमांक प्रविष्ट करा. जिथे ओटीपी आधारित पडताळणीची सुविधा उपलब्ध आहे. तिथे आधारशी लिंक असलेल्या मोबाइल क्रमांकावर प्राप्त झालेला ओटीपी टाकून ही प्रक्रिया पूर्ण केली जाऊ शकते. जर तुमचा मोबाईल क्रमांक आधारशी लिंक केलेला नसेल, तर ओटीपी आधारित पडताळणीमध्ये येणाऱ्या अडचणी टाळण्यासाठी तो आधीच अपडेट करून घ्या.