पणजी : कदंब परिवहन महामंडळातील (केटीसी) कर्मचाऱ्यांनी आपल्या विविध प्रलंबित मागण्यांसाठी आंदोलनाचे हत्यार उपसले असून, येत्या १२ नोव्हेंबर रोजी मध्यरात्रीपासून २४ तासांचा संप पुकारण्याचा इशारा दिला आहे. कदंब परिवहन महामंडळाच्या व्यवस्थापनाला केटीसी ड्रायव्हर्स अँड अलाइड एम्प्लॉईज असोसिएशनने यासंदर्भात संपाची अधिकृत नोटीस बजावली आहे. संघटनेने एकूण १८ मागण्या मांडल्या असून, त्या मान्य न झाल्यास राज्यातील कदंब बससेवा पूर्णपणे ठप्प करण्याचा इशारा दिला आहे.

राज्यातील सार्वजनिक वाहतूक व्यवस्था अधिक सक्षम करण्यासाठी ३०० नवीन डिझेल बसगाड्यांची भरती करावी, अशी मागणीही संघटनेने केली आहे. त्याचबरोबर बसचालक आणि इतर कर्मचाऱ्यांसाठी स्वच्छतागृहे तसेच विश्रांतीगृहांची व्यवस्था करण्याची मागणी करण्यात आली आहे. कर्मचाऱ्यांच्या या १८ मागण्यांकडे महामंडळ व्यवस्थापनाने गांभीर्याने लक्ष देऊन तोडगा काढावा, अशी संघटनेची भूमिका आहे. मात्र, मागण्यांबाबत समाधानकारक निर्णय न झाल्यास १२ नोव्हेंबरच्या मध्यरात्रीपासून २४ तासांचा संप करण्यात येईल, असे नोटिशीत स्पष्ट करण्यात आले आहे. 

या संपामुळे राज्यातील सार्वजनिक वाहतूक व्यवस्थेवर परिणाम होण्याची शक्यता असून, प्रवाशांना मोठ्या गैरसोयीला सामोरे जावे लागू शकते. त्यामुळे संपापूर्वी महामंडळ व्यवस्थापन आणि कर्मचारी संघटना यांच्यात चर्चा होऊन तोडगा निघणार का, याकडे सर्वांचे लक्ष लागले आहे.

कर्मचाऱ्यांच्या मागण्यांसाठी आंदोलनाचा इशारा

संघटनेच्या प्रमुख मागण्यांमध्ये रोजंदारीवरील आणि तात्पुरत्या कर्मचाऱ्यांना सेवेत कायम करणे, नव्याने लागू करण्यात आलेली इलेक्ट्रॉनिक तिकीट मशीन (ईटीएम) प्रणाली मागे घेणे आणि सातव्या वेतन आयोगाची थकीत देणी तातडीने अदा करणे यांचा समावेश आहे. तसेच कर्मचाऱ्यांचे वेतन वाढविणे आणि त्यांना आवश्यक सोयीसुविधा उपलब्ध करून देण्याची मागणीही करण्यात आली आहे. 

विशेषतः इलेक्ट्रिक बस चालविणाऱ्या चालकांच्या वेतनाचा आणि कामाच्या ठिकाणी मिळणाऱ्या सुविधांचा प्रश्न संघटनेने उपस्थित केला आहे. याशिवाय कर्मचाऱ्यांचे भविष्य निर्वाह निधीचे (पीएफ) लाभ पूर्ववत सुरू करावेत, अशी मागणी करण्यात आली आहे.