सावंतवाडी : शहरात सार्वजनिक ठिकाणी आणि रस्त्यांच्या कडेला उघड्यावर सुरू असलेल्या अनाधिकृत मासे विक्रीमुळे पसरणारी दुर्गंधी, अस्वच्छता आणि वाहतुकीचा प्रश्न गंभीर बनला आहे. याप्रकरणी परवानाधारक मच्छी विक्रेत्यांनी सावंतवाडी नगरपरिषदेच्या नगराध्यक्षांकडे निवेदन देत योग्य त्या न्याय व कारवाईची मागणी केली होती. याची गांभीर्याने दखल घेत सावंतवाडी नगराध्यक्षा श्रद्धाराजे भोसले यांनी शहरात उघड्यावर मासे विक्री करणाऱ्या सर्व विक्रेत्यांना सक्त ताकीद दिली आहे. 

शहरातील कोणत्याही विक्रेत्याने रस्त्यावर किंवा अनधिकृत ठिकाणी उघड्यावर मासे विक्री न करता नगरपरिषदेतर्फे उपलब्ध करून देण्यात आलेल्या अधिकृत 'फिश मार्केट' मध्ये येऊनच आपला व्यवसाय करावा, असे आवाहन नगराध्यक्षांनी केले आहे.  या आवाहनानंतरही जर कोणी सार्वजनिक ठिकाणी किंवा उघड्यावर मासे विक्री करताना आढळल्यास, त्यांच्याविरुद्ध नियमानुसार कडक प्रशासकीय कारवाई करण्याचे आदेश प्रशासनाला नगराध्यक्षांनी दिले.  सावंतवाडी शहर स्वच्छ, सुंदर आणि आरोग्यदायी ठेवण्यासाठी सर्व नागरिकांनी व विक्रेत्यांनी सहकार्य करावे असंही त्यांनी म्हटलं आहे. यावेळी महिला बालकल्याण सभापती दिपाली भालेकर, पर्यटन सभापती मोहिनी मडगावकर, दुलारी रांगणेकर सुनिता पेडणेकर, नीलम नाईक, सुकन्या टोपले आदी नगरसेवक उपस्थित होते.