Vasco Fire News : गोव्यातील वास्को शहरात दोन भीषण आगी लागल्याची घटना घडली आहे. यातील एका बाजारपेठेत लागलेल्या भीषण आगीत १५० हून अधिक दुकाने जळून खाक झाली आहेत, अशी माहिती अधिकाऱ्यांनी गुरुवारी दिली. या एकापाठोपाठ घडलेल्या आगीच्या घटनांमुळे शहरात काही काळ गोंधळाचे वातावरण निर्माण झाले होते. 

बुधवारी रात्री साडेदहाच्या सुमारास टिळक मैदानाजवळ कार ऍक्सेसरीजच्या दुकानाला अचानक आग लागली. या आगीत दुकान पूर्णपणे जळून खाक झाले असून दुकानाच्या बाजूला असलेल्या दोन दुचाकीही जळून खाक झाल्या. आगीत मालाचे प्रचंड नुकसान झाले. सुदैवाने या घटनेत कोणीही जखमी झाले नाही असे अधिकाऱ्यांनी सांगितले. ही आग विझवण्यासाठी अग्निशामक दलाने शर्थीचे प्रयत्न केले. आग आटोक्यात आल्यानंतर दलाचे कर्मचारी परतत असतानाच रात्री 11 वाजून 55 मिनिटांच्या सुमारास रविवार बाजारपेठेत (संण्डे मार्केट) मध्ये दुसरी आग लागली. या आगीत १५० हून अधिक दुकाने नष्ट झाल्याची माहिती आहे.

ऐन दिवाळीच्या सणाच्या तोंडावर ग्राहकांसाठी भरून ठेवलेला माल बाजारपेठेत लागलेल्या आगीत नष्ट झाल्याने अनेक व्यापारी हतबल होऊन अश्रू ढाळताना दिसले. या आगीत कपडे, पादत्राणे, भांडी आणि विविध वस्तू विकणाऱ्या लहान व्यावसायिकांचे यामुळे अतोनात नुकसान झाले.

आग विझवण्यासाठी शर्थीचे प्रयत्न

आगीची माहिती मिळताच अग्निशमन दलाच्या जवानांनी घटनास्थळी धाव घेत शर्थीचे प्रयत्न केले. आग आटोक्यात आणण्यासाठी वास्को, मडगाव, पणजी, वेर्णा, फोंडा आणि जुने गोवा येथून अग्निशामक दलाच्या गाड्या तातडीने रवाना करण्यात आल्या. पोलिसांनीही परिस्थिती हाताळली. पोलीस महासंचालक आलोक कुमार यांनी 'पीटीआय'ला सांगितले की, आग विझवण्यासाठी भारतीय नौदल, तटरक्षक दल, गोवा शिपयार्ड लिमिटेड आणि मोरमुगाव पोर्ट अथॉरिटीसह विविध संस्थांच्या अग्निशमन गाड्या तातडीने घटनास्थळी तैनात करण्यात आल्या होत्या.

मुख्यमंत्र्यांसह अधिकाऱ्यांनी घटनास्थळी दिली भेट
मुख्यमंत्री डॉ. प्रमोद सावंत, आमदार दाजी साळकर, आमदार संकल्प आमोणकर, मंत्री मावीन गुदिन्हो, दक्षिण गोव्याचे जिल्हाधिकारी आणि मामलेदार यांनी घटनास्थळी भेट देऊन पाहणी केली. मुख्यमंत्री डॉ. प्रमोद सावंत यांनी प्रसारमाध्यमांशी बोलताना स्पष्ट केले की, "या दुर्घटनेत झालेल्या नुकसानीची शासन पातळीवर सखोल पाहणी केली जाईल आणि प्रभावित सर्व दुकानदारांना सरकारतर्फे सर्वतोपरी आर्थिक मदत केली जाईल. या घटनेत कोणतीही जीवितहानी झाली नाही, याबद्दल मी देवाचे आभार मानतो." तसेच, काही व्यापाऱ्यांनी घातपाताचा संशय व्यक्त केल्यामुळे या संपूर्ण प्रकरणाची सखोल चौकशी करण्याचे निर्देश वास्को पोलिसांना देण्यात आल्याचे त्यांनी सांगितले.