नवी दिल्ली : एअर मार्शल आशुतोष दीक्षित यांची भारतीय हवाई दलाचे नवीन उपप्रमुख म्हणून नियुक्ती करण्यात आली आहे. त्यांना सुमारे ३,५०० तासांचा उड्डाणाचा अनुभव आहे. ६ डिसेंबर १९८६ रोजी हवाई दलाच्या लढाऊ विमान विभागात (फायटर स्ट्रीम) रुजू झाल्यापासून एअर मार्शल दीक्षित यांचा हवाई दलाशी दीर्घकाळ संबंध राहिला आहे.
ते एक पात्र उड्डाण प्रशिक्षक (फ्लाइंग इन्स्ट्रक्टर) आणि प्रायोगिक चाचणी वैमानिक (एक्सपेरिमेंटल टेस्ट पायलट) आहेत. एअर मार्शल दीक्षित यांना मिराज-२०००, मिग-२१ आणि जॅग्वारसह २० हून अधिक प्रकारची लढाऊ विमाने उडवण्याचा अनुभव आहे.
एअर मार्शल दीक्षित यांनी नॅशनल डिफेन्स अकादमी (खडकवासला), डिफेन्स सर्व्हिसेस स्टाफ कॉलेज आणि नॅशनल डिफेन्स कॉलेज (नवी दिल्ली) येथे शिक्षण घेतले आहे. हवाई दलातील कार्यकाळात त्यांनी अनेक महत्त्वाची पदे भूषवली आहेत. विशेषतः 'हेडक्वार्टर्स इंटिग्रेटेड डिफेन्स स्टाफ'मध्ये कार्यरत असताना त्यांनी लष्कर, नौदल आणि हवाई दल यांच्यातील समन्वय बळकट करण्यात महत्त्वाची भूमिका बजावली.
त्यांनी 'एअर हेडक्वार्टर्स'मध्येही विविध पदांवर काम केले असून, हवाई दलाला आधुनिक तंत्रज्ञान आणि शस्त्रास्त्रांनी सज्ज करण्यात त्यांनी महत्त्वपूर्ण भूमिका बजावली.
एअर मार्शल दीक्षित यांनी भारतीय हवाई दलात स्वदेशी लढाऊ विमान प्रकल्पांचा सातत्याने पुरस्कार केला आहे. बेंगळुरू येथील 'फ्लाइट टेस्ट स्क्वॉड्रन'चे कमांडिंग ऑफिसर म्हणून त्यांनी जॅग्वार आणि मिग-२७ विमानांच्या आधुनिकीकरणाच्या कार्यक्रमांमध्ये सहभाग घेतला होता. याव्यतिरिक्त, 'मिडियम मल्टी-रोल कॉम्बॅट एअरक्राफ्ट'च्या चाचण्यांचे नियोजन आणि नेतृत्व करण्यातही त्यांनी महत्त्वाची भूमिका बजावली.
