
सिंधुदुर्ग : १ नोव्हेंबर २००५ पूर्वी नियुक्त शिक्षक व शिक्षकेतर कर्मचाऱ्यांना जुनी पेन्शन योजना लागू करावी, तसेच अनुदान टप्पावाढ, त्रुटी पूर्तता, शेवटच्या वर्गाची पटसंख्या आणि पद दुरुस्ती यांसह शिक्षकांचे विविध प्रलंबित प्रश्न मार्गी लागावेत, यासाठी शिक्षक आमदारांनी शासनस्तरावर पाठपुरावा सुरू केला आहे.
या मागण्यांसंदर्भात मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि मंत्री पंकज भोयर यांच्यासोबत बैठक आयोजित करून द्यावी, या मागणीसाठी कोकण विभाग शिक्षक मतदारसंघाचे आमदार ज्ञानेश्वर म्हात्रे, पुणे विभाग शिक्षक मतदारसंघाचे आमदार कौस्तुभ गावडे, मुंबई शिक्षक मतदारसंघाचे आमदार ज. मो. अभ्यंकर आणि अमरावती विभागाचे शिक्षक आमदार किरण सरनाईक यांनी त्यांची काल भेट घेतली.
यावेळी बैठकीची तारीख निश्चित करण्याची मागणी करण्यात आली. त्यावर मुख्यमंत्र्यांनी जुनी पेन्शन समितीच्या पत्रावर वेळ देण्यासंदर्भात आपल्या सहाय्यकांकडे रिमार्क देऊन आवश्यक कार्यवाही करण्यास सांगितल्याची माहिती देण्यात आली. दरम्यान, आज होणाऱ्या न्यायालयीन सुनावणीच्या पार्श्वभूमीवर शासनाकडून सकारात्मक प्रतिसाद मिळावा, यासाठी उपसचिव उत्तम कांबळे यांचीही भेट घेण्यात आली. यावेळी शिक्षकांच्या विविध प्रलंबित प्रश्नांवर सविस्तर चर्चा करण्यात आली. या प्रसंगी जुनी पेन्शन संघटनेचे सचिन नलावडे, दत्ता पाटील यांच्यासह अन्य शिक्षक उपस्थित होते.
ताजी बातमी
View all




संबंधित बातम्या
View all








