कुडाळ : पावसाचा जोर वाढताच कुडाळ तालुक्यातील तेंडोली येथील उज्वला नदीला पाणी आले असून, यामुळे येथील तांबाडगेवाडीचा मुख्य संपर्क पूर्णपणे तुटला आहे. नदीच्या प्रवाहात झाडांची मोठी ओंडकी आणि कचरा वाहून येत असल्याने पाण्याचा निचरा होण्यास प्रचंड अडथळा निर्माण झाला आहे. परिणामी, येथील २५ ते ३० कुटुंबांचे जीवन अक्षरशः टांगणीला लागले असून, दरवर्षीप्रमाणे यंदाही या वाडीतील ग्रामस्थांना मरणयातना सोसाव्या लागत आहेत.
या संपूर्ण परिस्थितीला कारणीभूत ठरत आहे तो म्हणजे सध्या असलेल्या पुलाची अत्यंत कमी असलेली उंची. स्थानिक ग्रामस्थांनी दिलेल्या माहितीनुसार, या पुलाची उंची खूपच कमी असल्याने थोडा जरी पाऊस झाला, तरी उज्वला नदीचे पाणी पुलावरून वाहू लागते आणि संपूर्ण वाडीची कोंडी होते. "दरवर्षी नदीला पूर येतो, पाणी पुलावरून जाते आणि आमचा संपर्क तुटतो. जोपर्यंत या ठिकाणी एक चांगला आणि पुरेशा उंचीचा नवीन पूल (उंच पूल) बांधला जात नाही, तोपर्यंत आमची या त्रासातून सुटका होणार नाही," अशी संतप्त आणि आर्त मागणी आता ग्रामस्थांकडून केली जात आहे.
तांबाडगेवाडीला जोडणारा एकमेव लोखंडी साकव आता अत्यंत जुना आणि जीर्ण झाला आहे. आधीच पुलाची उंची कमी, त्यात पुराच्या पाण्याचा प्रचंड दबाव आणि वाहून येणारी मोठी ओंडकी यामुळे हा साकव कधीही कोसळून मोठी दुर्घटना घडण्याची भीती निर्माण झाली आहे. एखादी गंभीर वैद्यकीय आणीबाणी किंवा अडचणीचा प्रसंग ओढवल्यास या वाडीतील लोकांना जीव मुठीत धरून, पुरातूनच तारेवरची कसरत करावी लागत आहे. लहान मुले, वृद्ध आणि आजारी माणसांचे हाल तर आता बघवत नाहीत.
निवडणुका आल्या की मतांचे गाठोडे पदरात पाडून घेण्यासाठी पुलाची उंची वाढवण्याची आणि नवीन पूल बांधण्याची आश्वासने दिली जातात. मात्र, निवडणूक संपताच लोकप्रतिनिधी या वाडीकडे आणि आपल्या आश्वासनांकडे पूर्णपणे पाठ फिरवतात, असा थेट आरोप ग्रामस्थ करत आहेत. लोकप्रतिनिधी आपली ही आश्वासने कधी पूर्ण करणार आणि हक्काचा सुरक्षित, उंच पूल कधी मिळणार, याची येथील जनता आता चातकाप्रमाणे वाट पाहत आहे. दरवर्षी पावसाळ्यात होणारी ही ससेहोलपट आता ग्रामस्थांच्या सहनशक्तीच्या पलीकडे गेली आहे.
एकीकडे आपत्ती व्यवस्थापनाच्या मोठ्या-मोठ्या गप्पा मारणारे प्रशासन प्रत्यक्ष जमिनीवर मात्र पूर्णपणे अपयशी ठरल्याचे दिसत आहे. पुलाची उंची कमी असल्याने दरवर्षी हा प्रश्न उद्भवतो हे माहीत असतानाही शासकीय यंत्रणा अजूनही सुस्त का आहे, असा जळजळीत सवाल संतप्त जनतेने उपस्थित केला आहे. प्रशासन या गंभीर परिस्थितीची दखल घेऊन तातडीने उपाययोजना करणार की एखाद्या मोठ्या दुर्घटनेची वाट पाहत राहणार? असा थेट आणि कडक सवाल आता तेंडोलीकर विचारत आहेत.
