वेंगुर्ला : स्त्रीच्या हाताला कौशल्याची जोड, कष्टांना संधीची साथ आणि स्वप्नांना समाजाचे पाठबळ मिळाले तर ती केवळ कुटुंबच नव्हे, तर संपूर्ण समाजाच्या अर्थव्यवस्थेला नवी दिशा देऊ शकते. महिलांच्या याच कर्तृत्वाला सलाम करत त्यांच्या स्वावलंबनाचा आणि उद्योजकीय जिद्दीचा गौरव करणारा ‘लक्ष्मी आधार’ भव्य प्रदर्शन व विक्री महोत्सव २०२६ वेंगुर्ला येथे उत्साहात संपन्न झाला. इनरव्हील क्लब वेंगुर्ला आणि लक्ष्मी आधार सेवा फाउंडेशन, वेंगुर्ला यांच्या संयुक्त विद्यमाने आयोजित या उपक्रमाचे उद्घाटन वेदिका विशाल परब यांच्या हस्ते करण्यात आले.

यावेळी वेदिका विशाल परब यांनी महिला सक्षमीकरणाचा प्रभावी संदेश दिला. त्या म्हणाल्या, "महिलांना सहानुभूतीची नाही, तर त्यांच्या कर्तृत्वाला संधीची, त्यांच्या उत्पादनांना बाजारपेठेची आणि त्यांच्या स्वप्नांना भक्कम पाठबळाची गरज आहे. स्त्रीच्या हाताला कला, मनाला कल्पकता आणि कष्टांना संधी मिळाली, तर ती केवळ संसारच नाही, तर संपूर्ण समाज घडवू शकते. आज या व्यासपीठावर दहा महिला उद्योजिकांचा होणारा सन्मान हा केवळ दहा महिलांचा गौरव नसून हजारो महिलांना स्वावलंबनाची प्रेरणा देणारा दीपस्तंभ आहे."

‘महिला उद्योजिकेच्या स्टॉलवरून केलेली प्रत्येक खरेदी ही तिच्या व्यवसायाला मिळालेली संजीवनी आणि आत्मविश्वासाला मिळालेली नवी उभारी असते,’ असे सांगत स्थानिक महिला उद्योजिकांनी तयार केलेल्या वस्तूंना नागरिकांनी प्राधान्य द्यावे, असे आवाहनही त्यांनी केले.

या कार्यक्रमाला प्रमुख अतिथी म्हणून संध्या तेरसे (अध्यक्ष, नर्मदा आई संस्था) उपस्थित होत्या. यावेळी उल्लेखनीय कार्य करणाऱ्या दहा महिला उद्योजिकांचा विशेष सन्मान करण्यात आला. महिलांच्या कष्टाला प्रतिष्ठा आणि त्यांच्या उद्योजकीय प्रवासाला प्रोत्साहन देणारा हा सन्मान सोहळ्याचा विशेष आकर्षण ठरला.

या प्रदर्शनात महिलांनी स्वतःच्या कल्पकतेतून आणि मेहनतीतून तयार केलेल्या आकर्षक हस्तकला वस्तू, गृहउपयोगी साहित्य, विविध प्रकारची महिला निर्मित उत्पादने तसेच रुचकर आणि स्वादिष्ट खाद्यपदार्थांनी ग्राहकांचे लक्ष वेधून घेतले. महिलांच्या कलागुणांचे दर्शन घडविण्याबरोबरच त्यांच्या उत्पादनांना थेट ग्राहकांपर्यंत पोहोचविण्याची संधी या प्रदर्शनातून उपलब्ध झाली.

विशेष म्हणजे, हा उपक्रम केवळ प्रदर्शन आणि विक्रीपुरता मर्यादित न राहता महिलांना आर्थिकदृष्ट्या सक्षम बनविण्याच्या व्यापक उद्देशाने आयोजित करण्यात आला. महिलांच्या हाताला रोजगार, व्यवसायाला बाजारपेठ आणि कुटुंबाला आर्थिक स्थैर्य मिळवून देण्याच्या दृष्टीने या उपक्रमाचे महत्त्व अधोरेखित झाले.

इनरव्हील क्लब वेंगुर्ला आणि लक्ष्मी आधार सेवा फाउंडेशन यांनी महिलांच्या कर्तृत्वाला हक्काचे व्यासपीठ उपलब्ध करून देत महिला सक्षमीकरणाच्या दिशेने टाकलेले हे पाऊल निश्चितच कौतुकास्पद ठरले. ‘जिथे स्त्रीचा सन्मान, तिथे समृद्धीचे स्थान; जिथे स्त्री स्वावलंबी, तिथे प्रगत समाजाची खरी नांदी!’ या विचाराची प्रचिती देणारा ‘लक्ष्मी आधार’ महोत्सव महिला उद्योजिकांच्या आत्मविश्वासाला नवी झळाळी देणारा आणि त्यांच्या स्वप्नांना भरारी देणारा प्रेरणादायी उपक्रम ठरला.