कणकवली : जिल्ह्यातील रिक्त असलेल्या महसूलसेवक (कोतवाल) पदांसाठी कणकवली, कुडाळ, सावंतवाडी या तीनही उपविभागातील उमेदवारांसाठी लेखी परीक्षा रविवार, १५ नोव्हेंबर रोजी सकाळी ११ ते दुपारी १२ या वेळेत होणार आहे. परीक्षेच्या ओळखपत्रांचे वितरण ४ नोव्हेंबरपासून करण्यात येणार आहे.

प्रशासकीय सोयीसाठी व तांत्रिक सुलभतेसाठी तिन्ही उपविभागांमधील उमेदवारांची संयुक्त परीक्षा कुडाळ या मध्यवर्ती ठिकाणी घेण्याचे निश्चित करण्यात आले आहे. ही परीक्षा कुडाळ हायस्कूल आणि कराची महाराष्ट्रीय शिक्षण प्रसारक मंडळाच्या इंग्लिश मीडियम स्कूल, कुडाळ येथे होणार आहे.

कणकवली उपविभागातील संबंधित उमेदवारांची ओळखपत्रे देवगड, कणकवली व वैभववाडी येथे त्या-त्या तहसील कार्यालयामार्फत ४ ते १० नोव्हेंबर या कालावधीत कार्यालयीन कामकाजाच्या दिवशी व कार्यालयीन वेळेत वितरित केली जाणार आहेत.

संबंधित उमेदवारांनी नोंद घेऊन वेळेत आपली ओळखपत्रे प्राप्त करून घ्यावीत आणि निर्धारित दिवशी व वेळी आपल्या परीक्षा केंद्रावर उपस्थित राहवे, असे आवाहन कोतवाल निवड समितीचे अध्यक्ष तथा उपविभागीय अधिकारी जगदीश कातकर यांनी केले आहे