सावंतवाडी : शहरात पोलिसांनी ऑनलाईन पद्धतीने चालणाऱ्या मटका जुगारावर मोठी कारवाई केली आहे. एका हॉटस्पॉट नंबरवर 'कल्याण मटका'चे आकडे स्वीकारताना दोन जणांना पोलिसांनी रंगेहाथ पकडले असून त्यांच्यावर गुन्हा दाखल करण्यात आला आहे.
कणकवली येथे पालकमंत्री नितेश राणे यांनी मटका अड्ड्यावर टाकलेल्या धाडीनंतर आता सावंतवाडीत ऑनलाईन मटका जुगाराचे रॅकेट उघड झाले आहे. पोलिसांनी दिलेल्या माहितीनुसार, शहरातील सालईवाडा परिसरात एका व्यक्तीला मोबाईल हॉटस्पॉटचा वापर करून कल्याण मटका जुगाराचे आकडे घेताना पकडण्यात आले. चौकशी केली असता तो ही रक्कम सालईवाडा येथीलच दुसऱ्या एका व्यक्तीकडे देत असल्याचे समोर आले. पोलिसांनी त्वरित छापा टाकून या दोघांनाही ताब्यात घेतले.
या कारवाईत पोलिसांनी १० हजार रुपयांचा मोबाईल फोन आणि जुगारासाठी वापरले जाणारे १ हजार ५० रुपये रोख रक्कम जप्त केली आहे. याप्रकरणी सावंतवाडी पोलीस ठाण्यात गुन्हा दाखल करण्यात आला असून पुढील तपास सुरू आहे. ऑनलाईन जुगाराचे प्रमाण वाढत असताना पोलिसांनी केलेली ही कारवाई महत्त्वपूर्ण मानली जात आहे.
