कणकवली : फोंडाघाट येथे सकाळच्या सुमारास घरात घुसून दोन महिलांच्या अंगावरील दागिने चोरण्याचा प्रयत्न फसल्यानंतर पसार झालेल्या टोळीतील आणखी एका आरोपीला स्थानिक गुन्हा अन्वेषण शाखेच्या पथकाने मंगळवारी रात्री सांताक्रुज -  मुंबई येथे अटक केली. त्याला बुधवारी सकाळच्या सुमारास कणकवली पोलिसांच्या स्वाधीन करण्यात आले आहे. विल्सन जॉन पिंटो (५६, रा. सांताक्रुज) असे चोरट्याचे नाव असून त्याला आज बुधवारी दुपारनंतर न्यायालयात हजर करण्यात येणार असल्याची माहिती कणकवली पोलिसांनी दिली आहे.

ही घटना फोंडा गाडी येथे 30 नोव्हेंबरला सकाळी सात वाजण्याच्या सुमारास घडली होती. तृप्ती लिंग्रस व त्यांची आई या दोघी घरी होत्या तर तृप्ती यांचे भाऊ मॉर्निंग वॉकला गेले होते. याच दरम्याने वरील तीन इसम जबरदस्तीने त्यांच्या घरात घुसले. त्यांनी तृप्ती व तिच्या आईच्या अंगावरील दागिने पळवण्याचा प्रयत्न केला. मात्र दोघींनीही आरडाओरड केल्यानंतर तिन्ही चोरटे आपल्या हातातील साहित्य तिथेच टाकून पसार झाले होते. याबाबत तृप्ती यांच्या फिर्यादीनुसार घटनेची कणकवली पोलीस ठाण्यात नोंद करण्यात आली होती.

याबाबत स्थानिक गुन्हा अन्वेषण शाखेच्या पथकाने चारच दिवसांपूर्वी जगदीश श्रीराम यादव (२५, भिवंडी), चनाप्पा साईबाणा कांबळे (50, ठाणे), नागेश हनुमंत माने (41, नेरूळ)  अशा तिघांना मुंबई परिसरातून अटक केली होती.‌ आता चौथा आरोपीही अटकेत आला आहे. 

कारवाई मध्ये एलसीबीचे पोलीस उपनिरीक्षक अनिल हाडळ, हवालदार राजू जामसंडेकर, आशिष गंगावणे, किरण देसाई, ज्ञानेश्वर तवटे आदी सहभागी झाले होते.‌