नवी दिल्ली : एका मोठ्या तांत्रिक बिघाडामुळे मायक्रोसॉफ्टच्या अनेक सेवांवर परिणाम झाला आहे. याचा फटका मायक्रोसॉफ्टच्या क्लाउड आधारित सर्व्हिस 'मायक्रोसॉफ्ट ३६५'ला बसला असून यात आउटलुक (Outlook), मायक्रोसॉफ्ट टीम्स (Microsoft Teams) आणि एआय (AI) असिस्टंट 'को-पायलट' (Copilot) यांसारख्या प्लॅटफॉर्मचा समावेश आहे. या बिघाडामुळे जगभरातील युजर्सना ईमेल ओपन करण्यात, मेसेज पाठवण्यात आणि महत्त्वाची कामे पूर्ण करण्यात अडचणी आल्या. हा बिघाड १२ नोव्हेंबर रोजी झाला असून अनेक तास उलटूनही कंपनीला सेवा पूर्ववत करण्यात यश आलेले नाही.

दैनंदिन कामकाजासाठी मायक्रोसॉफ्ट ३६५ सेवांवर अवलंबून आहेत अशा कंपन्यां आणि कर्मचारी प्रभावित झाले आहेत. युजर्सनी तक्रार केली की त्यांना आउटलुकमध्ये ईमेल उघडता येत नव्हते किंवा नवीन मेसेज पाठवता आणि घेताही येत नव्हते. तसेच मायक्रोसॉफ्ट टीम्समधील काही फिचर्स आणि 'को-पायलट'च्या कामावरही परिणाम झाला.

'डाउनडिटेक्टर' या वेबसाइटनुसार, या घटनेदरम्यान आउटलुकबाबतच्या तक्रारींमध्ये मोठी वाढ झाली असून तक्रारींची संख्या १,३०,००० च्या वर पोहोचली होती. हजारो युजर्सनी इतर मायक्रोसॉफ्ट ३६५ सेवांबाबतही तक्रारी नोंदवल्या.

मायक्रोसॉफ्टने या परिस्थितीबाबत माहिती देताना स्पष्ट केले आहे की, हा प्रॉब्लेम सायबर हल्ला किंवा हॅकिंगमुळे झाल्याचा कोणताही पुरावा मिळालेला नाही. तपासात असे दिसून आले की, सर्व्हर आणि नेटवर्कशी संबंधित एक टेक्निकल प्रॉब्लेम निर्माण झाला होता. विशेषतः काही सर्व्हरवर सिक्युअर कनेक्शन बनवणारी सिस्टीम ओव्हरलोड झाली होती. यामुळे सर्व्हर रिक्वेस्टना प्रतिसाद देऊ शकले नाहीत. परिणामी विविध सेवा विस्कळीत झाल्या. कंपनी सध्या हा प्रॉब्लेम सोडवण्यासाठी पावले उचलत आहे. यामध्ये सर्व्हरची क्षमता वाढवणे, नेटवर्क सेटिंग्जमध्ये बदल करणे आणि प्रभावित सिस्टिम रिस्टार्ट करणे यांचा समावेश आहे.