नवी दिल्ली : कृषी क्षेत्रातील एक कंपनी शेअर बाजारात आपला आयपीओ लॉन्च करण्यास सज्ज झाली आहे. सुमारे ३२ वर्षांपासून कार्यरत असलेल्या 'क्रिस्टल क्रॉप प्रोटेक्शन लिमिटेड' कंपनीचा आयपीओ येणार आहे. रिटेल गुंतवणूकदारांसाठी हा आयपीओ १८ नोव्हेंबरपासून खुला होणार आहे. चला तर या आयपीओबाबत अधिक माहिती जाणून घेऊया.

१९९४ मध्ये सुरु झालेली 'क्रिस्टल क्रॉप प्रोटेक्शन' कंपनी पिकांच्या संरक्षणासाठी विविध उपाय उपलब्ध करून देते. कंपनीच्या उत्पादनांच्या कॅटेगरीमध्ये तणनाशके, बुरशीनाशके आणि कीटकनाशकांचा समावेश आहे. तसेच कंपनी नैसर्गिक पीक उपायही पुरवते. यामध्ये बायो-स्टिम्युलंट्स, बायो-प्रोटेक्टंट्स, वनस्पती वाढ नियामक, द्रव खते आणि सूक्ष्म पोषक घटकांचा समावेश आहे.

क्रिस्टल क्रॉप प्रोटेक्शन लिमिटेडचा आयपीओ ४५६ कोटी रुपयांचा असून तो १८ नोव्हेंबर ते २० नोव्हेंबर या कालावधीत रिटेल गुंतवणूकदारांसाठी खुला असेल. या आयपीओसाठी प्रति शेअर २५९ ते २७२ रुपयांची प्राइस बँड निश्चित करण्यात आली आहे. या आयपीओमध्ये ३५५ कोटी रुपयांपर्यंतचे नवीन शेअर्स जारी केले जाणार आहेत, तर १०१ कोटी रुपयांपर्यंतचे शेअर्स 'ऑफर फॉर सेल' अंतर्गत विकले जाणार आहेत.

क्रिस्टल क्रॉप प्रोटेक्शनच्या आयपीओ अंतर्गत शेअर्सचे वाटप २३ नोव्हेंबर रोजी होण्याची शक्यता आहे. ज्या अर्जदारांना शेअर्स मिळालेले नाहीत, त्यांना २५ नोव्हेंबरपासून परतावा देण्यास सुरुवात होईल. ज्यांना शेअर्सचे वाटप झाले आहे त्यांच्या डीमॅट खात्यात हे शेअर्स जमा केले जातील. हे इक्विटी शेअर्स २६ नोव्हेंबर रोजी बीएसई आणि एनएसई वर लिस्ट होण्याची अपेक्षा आहे.

या आयपीओसाठी 'डॅम कॅपिटल ॲडव्हायझर्स', 'आयआयएफएल कॅपिटल सर्व्हिसेस' आणि 'मोतीलाल ओसवाल इन्व्हेस्टमेंट ॲडव्हायझर्स' हे 'बुक-रनिंग लीड मॅनेजर्स' आहेत. तर 'एमयूएफजी इनटाइम इंडिया' यांची रजिस्ट्रार म्हणून नियुक्ती करण्यात आली आहे.

(डिस्क्लेमर : माहिती शेअर करण्याच्या उद्देशाने हा लेख देण्यात आला आहे. गुंतवणुकीचा सल्ला या लेखात देण्यात आलेला नाही. शेअर बाजारात गुंतवणूक करताना जोखीम असते. त्यामुळे स्वतःच्या जोखमीवर शेअर बाजारात गुंतवणुक करा. गुंतवणूक करण्याआधी संबंधित क्षेत्रातील तज्ज्ञांचा सल्ला घ्यावा...)