मुंबई : गुंतवणूकदारांसाठी एफडी हा आजही गुंतवणुकीचा लोकप्रिय पर्याय आहे. विशेषतः ज्येष्ठ नागरिकांमध्ये एफडी करण्याचे प्रमाण जास्त आहे. त्यामुळेच बँका एफडीवर आकर्षक परतावा देत आहेत. सध्या काही बँका एफडीवर ८ टक्क्यांपर्यंत व्याजदर देत आहेत. ज्येष्ठ नागरिकांसाठी सर्वोत्तम एफडी व्याजदर कोणत्या बँका देत आहेत, ते आपण जाणून घेऊया.
'या' बॅंका देत आहेत ८ टक्के व्याजदर
सूर्योदय स्मॉल फायनान्स बँक ज्येष्ठ नागरिकांसाठी ५ वर्षांच्या एफडीवर ८.०५ टक्के व्याज देत आहे. जना स्मॉल फायनान्स बँक ज्येष्ठ नागरिकांना एफडीवर ८ टक्के व्याज देत आहे. ज्येष्ठ नागरिकांसाठी ५ वर्षांच्या एफडीवर एयू स्मॉल फायनान्स बँक ७.२५ टक्के व्याजदर , इक्विटास स्मॉल फायनान्स बँक ७.५० टक्के व्याजदर, शिवालिक स्मॉल फायनान्स बँक ६.७५ टक्के व्याजदर आणि स्लिक स्मॉल फायनान्स बँक ७.२५ टक्के व्याजदर देत आहेत. हे दर ३ कोटी रुपयांपेक्षा कमी रकमेच्या एफडीसाठी लागू आहेत.
इतर बँका कोणते व्याजदर देत आहेत?
स्टेट बँक ऑफ इंडियाने ज्येष्ठ नागरिकांसाठी एफडीवर ७.०५ टक्क्यांपर्यंत व्याजदर जाहीर केले आहेत. एचडीएफसी बँक ४ वर्षे, ७ महिने आणि १ दिवस कालावधीच्या एफडीवर ६.९० टक्क्यांपर्यंत व्याज देत आहे. आयसीआयसीआय बँक ५ वर्षांच्या एफडीवर ७.१० टक्के व्याज देत आहे.
पीएनबी ५ वर्षांच्या मुदत ठेवींवर ६.८५ टक्के व्याज देत आहे, तर ॲक्सिस बँक ज्येष्ठ नागरिकांना ७.२५ टक्के व्याज देत आहे. जर मुदत ठेवीवर मिळणारे व्याज १ लाख रुपयांपेक्षा जास्त असेल, तर त्यावर टीडीएस कापला जातो. दरम्यान, संबंधित व्यक्ती परताव्यासाठी पात्र असल्यास, इन्कम टॅक्स रिटर्न भरून हा टीडीएस परत मिळवता येतो.
(डिस्क्लेमर - गुंतवणूकदारांनी गुंतवणूक करण्याआधी संबंधित बॅंकेत जाऊन एफडीच्या योजनेबाबत माहिती जाणून घ्यावी व त्यानंतरच गुंतवणूक करावी. दर्शवलेले व्याज आणि मॅच्युरीटी रक्कम केवळ अंदाजे किंवा माहितीसाठी आहे. प्रत्यक्ष दर बँक किंवा संस्थेच्या नियमांनुसार बदलू शकतात आणि यावर आयकर नियमांनुसार टीडीएस लागू शकतो.)
