वेंगुर्ला : तालुक्यात काही गावात शुक्रवारी सायंकाळी विजांच्या गडगडाटासह बरसलेल्या जोरदार परतीच्या पावसामुळे वेंगुर्ला तुळस मार्गे सावंतवाडी मुख्य रस्त्यावर तुळस घाटी येथे मोठे झाड पडून काही काळ वाहतूक ठप्प झाली होती. ग्रामस्थांच्या सहाय्याने झाड बाजूला करून वाहतूक सुरळीत करण्यात आली. दरम्यान वीज वाहिन्या तुटल्याने रात्री उशिरापर्यंत वीज पुरवठा खंडित होता. 

मुख्य रस्त्यावर झाड पडल्याची माहिती मिळताच वेंगुर्ला पंचायत समिती सभापती शंकर घारे व सामाजिक कार्यकर्ते रामचंद्र परब यांनी तात्काळ सार्वजनिक बांधकाम विभागाशी संपर्क साधून जेसीबीच्या सहाय्याने झाड बाजूला करण्यात मदत झाली. यावेळी सदर घटनास्थळी उपसरपंच नारायण कुंभार, पोलीस पाटील सागर सावंत, तंटामुक्त अध्यक्ष रवींद्र (नाना) राऊळ, सुभाष सावंत, गजानन कुंभार, रघुनाथ सावंत यांनी उपस्थित राहून रस्त्यावरील झाड बाजूला करण्यास मदत केली.