कुडाळ :  येथील डम्पिंग ग्राउंडला आज सकाळपासून आग लागल्याची घटना समोर आली आहे. सकाळी लागलेली ही आग संध्याकाळपर्यंत धुमसत असल्याने परिसरात धुराचे मोठमोठे लोट पसरले आहेत. त्यामुळे परिसरातील नागरिकांना धुराचा त्रास सहन करावा लागत आहे.

डम्पिंग ग्राउंडमध्ये साठवून ठेवलेल्या कचऱ्याला आग लागल्याने परिसरात मोठ्या प्रमाणात धूर पसरला आहे. आगीची माहिती मिळताच कुडाळ नगरपंचायतीच्या अग्निशामक दलाने घटनास्थळी धाव घेत आग विझवण्याचे प्रयत्न सुरू केले. मात्र, कचऱ्याच्या ढिगाऱ्यात आग धुमसत असल्याने ती पूर्णपणे विझवण्यासाठी अग्निशामक दलाला प्रयत्न करावे लागत आहेत.

सकाळपासून लागलेली आग संध्याकाळपर्यंत सुरूच असल्याने परिसरात धुराचे साम्राज्य निर्माण झाले आहे. या धुरामुळे स्थानिक नागरिकांना श्वास घेण्यास त्रास होण्याची शक्यता असून, आरोग्याच्या दृष्टीनेही चिंता व्यक्त केली जात आहे.

दरम्यान, डम्पिंग ग्राउंडवरील आगीच्या घटनांमुळे कचरा व्यवस्थापनाचा प्रश्न पुन्हा एकदा चर्चेत आला आहे. कचऱ्याला आग नेमकी कशामुळे लागली, याचे कारण अद्याप स्पष्ट झालेले नाही.नगरपंचायत प्रशासनाने आगीवर पूर्णपणे नियंत्रण मिळवून परिसरातील नागरिकांना धुराच्या त्रासातून दिलासा द्यावा, अशी मागणी होत आहे.